Aabru ha qareene walon ki.

Aabru ha qareene walon ki.
Apne lab aap seene walon ki.

Marny walon ko ro raha ha kya.
Be'kasi dekh jeene walon ki.

Barh k saghar ko torr de koi.
Rooh tishna ha peene walon ki.

Ham to parwarda-e talatum hen.
Mushkilen hen safeene walon ki.

Dil hi tooten ge jaam k badly.
Anjuman ha qareene walon ki.

Zakhm-e dil bhi hansi urraty hen.
Daaman-e chaak seene walon ki.

Ham bohat yad aaye saaqi ko.
Guftagu thi na peene walon ki.

Sehal kar di hen mushkilen kitni.
Marny walon ne jeene walon ki.

QABIL AJMERI