Do nigahon ka tasadum na'gahaa'n hona hi tha,QABIL AJMERI

Do nigahon ka tasadum na'gahaa'n hona hi tha
Zindgi ko shaad,fitrat ko jawa'n hona hi tha.

Behki behki si nazer ko sharm kb tk rokti
Ik dil-e nashaad ko bhi shadmaa'n hona hi tha.

Husn tha kuch behka behka,ishq tha kuch hoshyaar
Aaj to barham nizam-e do'jahaa'n hona hi tha.

Karwaan-e zindagi ne murr k dekha bhi nahin
Jese armanon ko gard-e karwaa'n hona hi tha.

Gham kahan tk gudgudaty,ishq kb tk chherrta
Zindgi ko aek din khawab-e garaa'n hona hi tha.

Zulmat-e shab main hamee'n thay roshni k muda'ee
Aatish-e gham se hamen shola bajaa'n hona hi tha.

Daar o geer-e zeest ki sorat'gari aasa'n na thi
Fikr ko majrooh fann ko kho'nchakaa'n hona hi tha

Main ne un honton ko choma main ne un ankhon se pi
Behka behka sa mera tarz-e bayaa'n hona hi tha.

Aarzu naghma'sara ha chaandni afsoo'n taraaz
Aese aalam main tumhen na'mehrbaa'n hona hi tha.

Teri hamdardi salamat dil ki betaabi bakhair
Mouj-e gham ko barh k sail-e bekaraa'n hona hi tha.

Zindagi phir zindagi ha bazm-e jana'n ha to kaya
Ishq ko andesha-e sood o zayaa'n hona hi tha.

Hosly kya kya barhaye jour-e be'jaa ne magr
Sayyi tark-e aarzu ko rayegaa'n hona hi tha.

Aaj QABIL fikr-e peham se rihaai mil gayi
Mehrbaa'n ko aek din na'mehrbaa'n hona hi tha.

QABIL AJMERI