Dunia me dahshatgardi bure logon ki sakriyata se zyada achhe logon ki nishkriyata se hui

Pichhle 3000 saal me dunia ne 15000 yudhh dekhe. Ye kis baat ka sanket hai? Maatra aham ki ladaai ka! Hum kitne andhe ho chuke hain ki koi thoda bhi dharm mazhab ke naam pe uksaaye ladne chal padte hain. Ye bhi aham ka hi ek khel hai. Kabhi saamrajyawaad,kabhi dharmwaad ke peeche insaan itna neeche gir chuka hai ki swayam ki suraksha bhi desh nuclear bomb banakar kar rahe hain. Desh,samaaj wa dunia me wahshat wa dahshat ka bolbaala hai. Kahin muzaffarnagar me dange ho rahe kahin azamgarh hindu muslim me bata hua hai. Kahin border paar kar log shaheedon ka sir kaat le jaate kahin sansad par bhi hamle ho rahe. Kabhi mandir masjid me bomb rakhke begunaah logon ko uda dia jaata. Kahin balaatkaari khuleaam maa behen beti ki izzat lootke ghoom rahe hain aur desh ke neta agle election ke lie paisa banaane ki loot khasot me. Kahin din dahade chori,dkaiti,hatya ho rahi kahin report likhne waali police apraadhiyon se hafta le rahi.Kahin cheen arunachal pradesh tak aa gaya kahin neta hi desh ko nilaam karne me lage hain. Chaaro taraf atyachaar,vyabhichaar,arajakta,gundagardi,kuvyavastha,bhrastachaar,apraad,dahshatgardi khoon kharaabe ka bolbaala hai. Buniyaadi wajah hai logon ko swayam ko shareer maanna aur aham ko sarwaswa. Logon ke beech me man-budhhi ko niyantrit karne ka wigyaan lupt ho chuka hai isliye manushya moorkhata me man par hi prayog kia jaata hai aur patan me girta jaata hai. Aaj manushya kya manushya kahlane yogya hai? Jinhone waqt ki ahmiyat samajhte hue swayam ko adhyaatm me laga shanti prapt kar li we dunia se hi mukh mod baithe. Beech ka jo sabse bada warg hai wo sahi disha na paane ke kaaran adhar me hi rah gaya. Unme bhi jo budhhijeevi warg raha udaseen ho gaya athaart jo hai jaisa hai theek hai ki neeti pe chalne laga. Dunia isiliye kharaab logon ki sakriyata se zyaada achhe logon ki nishkriyata se kharaab hui. Log matlab wichaardhaara. Parantu yadi hum dhyaan ko samjhen to samaaj me naye surya ka uday ho jaaye tab wyakti ye jaan jaega ki sukh bahar nahi andar hai,swayam me hai.

Great Work @Kaash Jee.