GHANDHI JAYANTI PAR AIK NAZM GHANDI JI KE NAAM BATAUR KHIRAAJ-e-AQEEDAT

Kal yaani k 2nd October GHANDI JAYANTI hai aur is Qaumi Teohaar ke shubh avsar par GHANDI JI ko bataur Khiraaj-e-Aqeedat apni ye mundarja-zail nazm pesh karne ji jasaarat kar raha hooN is ummeed ke saath k ye agar kisi qaabil ho to khaaksaar ko duwaaon se aur apni aara se nawaaz dijiyega:

Kaisi sheetal hai chahooN aor pawan aaj ki raat
Pesh-e-khidmat hai sharaddha ke suman aaj ki raat

Itna purkaif hai Bharat ka chaman aaj ki raat
KahkashaaN, chaaNd, sitaare haiN magan aaj ki raat

Nikhat-o-noor meiN dooba hai watan aaj ki raat
Saari duniya nazar aati hai dulahn aaj ki raat

Mushk-o-ambar se faza ho gayee khooshboo khooshboo
Band kaliyoN ne jo khole haiN dahan aaj ki raat

Jinka paighaam AHINSA hai zamaane ke liye
Naqsh haiN dil pe sabhi unke wachan aaj ki raat

Subh-e-aazaadi mili hai hameiN unke dam se
Yaad karte haiN sabhi ahle-sukhan aaj ki raat

Mulk ki shaan haiN Baaba-e-Watan haiN GHANDHI
Unko har dil ne kaha Fakhr-e-Watan aaj ki raat

Kaisi ithlaati hui phirti hai titli dekho
Likh diye paNkh pe “Ghandhi ke Wachan” aaj ki raat

Hai dua-e-dil-e-Waquif watan aabaad rahe
Poora ho jaaye jo “Ghandhi ka Mission” aaj ki raat

(Waquif Ansari)