Roz Ik Zakhm Naya Mujhko Diye Jaate Hain : Rekhta Pataulvi

Roz Ik Zakhm Naya Mujhko Diye Jaate Hain
Mujhpe Aahbaab Ye Ahsaan Kiye Jaate Hain

Jab Bhi Takhreeb Ka Jazba Kahin Jaag Uthta Hai
Baaton Baaton Mein Chaman Foonk Diye Jaate Hain

Kuchh Adaon Ko Teri Naam Diye Hain Humne
Sab Adaon Ko Kahan Naam Diye Jaate Hain

Dile Majrooh ! Tere Waaste Khushkhabri Hai
Aur Kuchh Zakhm Naye Tujhko Diye Jaate Hain

Aik Wo Hain Ke Hamari Nahin Parwa Unko
Aik Hum Unke Liye Zahar Piye Jaate Hain

Nauk-e-Nashtar Ko Samajh Rakha Hai Sauzan Tune
Chaaraagar! Aise Kahin Zakhm Siye Jaate Hain

Aaj Har Samt Go Shohrat-e-Sahba –e-Jadeed
Magar Baada-e-Kohna Hi Piye Jaate Hain

Mere Aaba Ko Jo Haasil The Chaman Mein Hamdam !
Ikhtiyaaraat Wo Ab Mujhse Liye Jaate Hain

Zahar Peene Mein Kati  Rekhta Sab Apni Hayaat
Hasrat-e-Baadakashi Dil Mein Liye Jaate Hain.

khoob farmayaa zia sahab ...! waah