SHARARAT . THODI . SI ....................... HASAN

Chehre pe chamak , Baaton  mein  Khanak , Aankhon  mein  Sharaarat  thodi si
Kya  Jurm  tha  jo  Dil  bhool  gaya  apni  bhi. Sharaafat  thodi  si
.
Aakaash talak  dekh  aaye  hain , koi  bhi  nahee'n  Humsar  tera
Haa'n Chaand mei'n  bus  mil  jaati  hai  kuch  teri  Shabaahat  thodi  si
.
Hum  un se  Kasheeda  rahte  hai'n , Woh  Hum se  Kasheeda  rahte  hai'n
Dono'n  mei'n  Anaayei'n  thodi  si , Dono'n  ko  Shikaayat  thodi  si
.
Aalaam - e - zamaana  se  to  Hum , murjhaaye  se  rahte  hai'n  lekin
Deedaar  se  un ke  aaye  hai  Chehre  pe  Bashaashat  thodi  si
.
Hum  khoob  samajhte  hai'n  yaaro , Maf'hoom  tumhaari  Baato'n  ka
Allah  ne  bakhshi  hai  shaayed , Hum ko  bhi  Zihaanat  thodi  si
.
Chhod  aaye  Haram  ki  khaatir  go , sab  Jaam-o-Suboo  ki  shaamein  Hum
Baaqi  hai  magar  Dil  mei'n  ab  bhi , Maikhaane  se  Raghbat  thodi  si
.
Dilbar  ki adaao'n  se  hi  bus , bhaa'npe  hai'n 'Hasan' , Dilbar  ka mizaaj
Hai  fun  mei'n  Mohabbat  ke  haasil , Hum  ko  bhi  Mahaarat  thodi  si
.
- Hasan . Shamsi -
................................
Humsar = Baraabar ka ; Shabaahat = Resemblence ; Kasheeda = khinche - khinche ;Ana = Ego ;
Aalaam = Pareshaaniyan ; Bashaashat = Taazgi , Freshness ; Mafhoom = Meaning ; Haram = Kaaba ;
Jaam-o-Suboo = Shaaraab ; Raghbat = inclination , chaahat ;

Chehre pe chamak , Baaton  mein  Khanak , Aankhon  mein  Sharaarat  thodi si
Kya  Jurm  tha  jo  Dil  bhool  gaya  apni  bhi. Sharaafat  thodi  si
.
Aakaash talak  dekh  aaye  hain , koi  bhi  nahee'n  Humsar  tera
Haa'n Chaand mei'n  bus  mil  jaati  hai  kuch  teri  Shabaahat  thodi  si

bahut bahut khoobsurat janaab Hasan Sahib waah waaahh waaahhhhhhhhhhhhh!!!!!!!!!!!!!!!!!!!!!!!!!!!!!!!!!!!!!!!!!!!!!!!
 
                    
                                        

aaaaaaah kya baat hai mastttttttt
 

 
 
bahut bahut khoooooooooooob Hasan sir ji. dheron 2 daaaaaaaaaaaaad

SURESH SANGWAN JI THANKS A LOT