yooN laakh ik Kharaaba-e-deevaar-o-dar mile

yooN laakh ik Kharaaba.e.deevaar.o.dar mile
mushkil hai iss jahaaN meiN hameN apnaa ghar mile!

Khoon.e.jigar, Kharaabee.e.jaaN, chashm.e.tar mile
tuHfe junooN meiN Khoob se kyaa Khoob.tar mile!

Allah re raah.e.shauq kee yeh Khud.farebiyaaN!
sab be.Khabar the jo bhee hameN baa.Khabar mile

but.Khaana.e.majaaz Haqeeqat.shanaas hai
meree nigaah.e.paak ko but Haq.nigar mile

jee meiN hai dekheN kaargah.e.be'sutoon.e.ishq
thoRee se hee mile hameN fursat, magar mile!

aavaargee.e.dasht.e.Khayaal.o.gumaan.e.zeest!
jaisaa safar thaa, vaise hameN ham.safar mile!

yeh kyaa k saath ChhoR gaye rooH.o.jaan.o.dil?
raah.e.vafaa meiN ko'yee to ik ham.safar mile!

Wabasta ham un kee fikr bhee kar leN ge aik din
apnee talaash se hameN fursat agar mile!