zarraa ..... ye zarooree to naheeN

jagjit singh sahab ki gaayee huwee mashhoor ghazal "umr jalwoN meiN basar ho ye zarooree to naheeN" (shayar : janaab  khaamosh ghaazipuri) ki zameen par meri ghazal kehne ki ek shikastsh koshish



ab ke achchhee hi khabar ho ye zarooree to naheeN
dil bhi maayoos magar ho ye zarooree to naheeN

koyee is shab* ki sahar* ho ye zarooree to naheeN
jaag ke raat basar ho ye zarooree to naheeN
( shab = night, sahar = dawn)

jo teri raahguzar* hai wo meri manzil hai
lekin ismeiN mera ghar ho ye zarooree to naheeN
( raahguzar = road/path)

kitni dushvaariyoN* ke baad pataa us ka mila
haaN par aasaan dagar* ho ye zarooree to naheeN
( dushvaariyoN = difficulties, dagar = path)

muskuraate huwe karte haiN vida rasm hai ye
par meri aaNkh na tar ho ye zarooree to naheeN

mar ke dekheNge jo naakaam agar ho sab kuchh
lekin is ka bhi asar ho ye zarooree to naheeN

kaise jeeta koyee tadpa ke kisi ko itna
par use kuchh bhi khabar ho ye zarooree to naheeN

tu ne pattoN ka bana taaj-mahal tha socha
rukh hawa ka na idhar ho ye zarooree to naheeN

meri hasti naheeN kuchh bhi tera qad kitna hai
mujh ko lekin tera dar ho ye zarooree to naheeN

su-e-maqtal* badi shiddat* se chala tu "zarraa"
par talab* tera hi sar ho ye zarooree to naheeN
( su-e-maqtal = towards slaughter house, shiddat = intensity, talab = called for)

- zarraa

very good 

wow, very beautiful, bahut dino baad ek achhi ghazal padi hai. Superb.