Prince-chotu

bahoot chota hai wo abhi bolna sikh raha hai...lekin usane mujhe jitana sikhaya hai, shayad saari jindagi hazaron kitaaben padkar bhi nahi sikh paya..
ya phir yun kahen ki suna to tha par shayad jis tareeke se "isane" mujhe samjhaya wo ek anokha hi tareeka tha..
Sabse pahle to usane mujhe sikhai "puncualty" & "importance of time". har subah uske nanhe haath mere baalon se khelate hue bata jate hai ki subah ke 5 baj chuke hai. ab aankhen kholo. aur aanken kholte hi uski pyari si muskaan chay ki talab ko khatam karane ke liye kaafi hoti hai.
ek wo bhi time tha "jab tak bed tea na mile sahab uthane ka naam hi nahi lete the aur wo bhi 7-8 baje
phir usaki apani hi anjaani bhasha "o o o aa aa aa" me wo mujhe kahata hai ke ab kamarey se bahar chalo garden me.
godi me jaana wo pasand nahi karta, apani nanhi si hatheli mere hathon me pakdakar wo daudna shuru kar deta hai 2 mahine pahle hi wo pairon se chalana sikha hai.
yes mai apne 1 saal ke bete ki baat kar raha hun "prince" naam hai uska.
bahoot kuch likhunga mai is thread me but abhi ijajat chahta hun.....

meet my son
http://picasaweb.google.com/chobey/Prince
 

 oh thanks mahiya..

ek wakya mai yahan share karna chahunga.. takreeban 1 maheene pahle ki baat hai. uski mummy ne use "namaste" karana aur paon chuna sikhaya.
aur apani nanhi nanhi hatheliyon ko kuch atpate se andaaz me (ek hatheli kuch upar hoti hai aur ek kuch neeche) milakar hanste hue namaste karna, ye seen wakai dekhne wala hota hai.
khair hum log ek bahoot hi mash-hoor HANUMAN mandir me darshan ke liye gaye the.
darshan karke hum log wahin kuch der baith gaye. prince to bahar ja kar aur bahut se logon ko dekhkar bahoot khush hota hai,
aur janab baithne ka to ye naam hi nahi lete hai bas yahann se wahan, bhagate raho.
aur phir usne mujhe sikhaya wo "sabak" jo bachpan se seekhane ke baad bhi kabhi mere samjh nahi aa paya tha......
usi din subah isne namaste karna seekha tha aur fir mahashay ne mandir me jitne log baithe the sabhi ko ja ja kar namste karna shuru kar diya.. ab ye bol to paate nahi, bas ek pyari si muskaan, nanhi hatheliyan aaps me judi aur ek aawaz si nikalte hai ye kuch aaa. aaaaa. saamnewale ne dekha nazaren char hui aur fir ye bhag kar dusare kisi ke paas pahunch jaate..
mandir me lagbhag sabhi logon se abhiwadan ka aadan-pradaan kar chukane ke baad janab bahar ki or baithe bhikhariyon ko namste karne lage..
us massom ki nazar me bhikari aur raja me koi phark nahi, use nahi pata ki bhikari ko samman nahi, dutkaar dee jati hai...
nahi pata use.. .. use maaloom hai to bas itna ki wo bas mere aas paas rahne waale bahoot se aur logon jaise hi log hai..

takreeban ek ghanta usane bhikhari se lekar har maujood shakhs se namste ki.....
shayad mujhe samjhane ke liye hi ki koi bhi aadmi apani majboori ya peshe se chota bada nahi hota. yadi wo aapse bada hai to samman ka adhikari hai.
mujhe yaad hai ke hamare chote se shahar me mere bachpan ke dino tak kuch had tak ye chalan tha ki jab hummorning walk pe jaate the to jo bhi buzurg hame milta hum use "jai ram ji baba" jaroor kahte the.....
aur ab yadi koi jaan pahchaan wala dikh bhi jaye to andekha karke nikalne ki koshish karte hain...
anyway us din ke baad se maini sabhi badon ko wish karane ki aadat daal li hai.   

yes celmira..you are right..
jab se ye nanha meri life me aaya hai.. zindagi ke mayne hi badal chuke hain...
aur ab to aalam ye hai ke har din ye bhi ek nayi baat sikhata hai aur mujhe bhi kuch naya sikhata hai....

Bahoot hi achi thread kholi hai apne bekarar ji!!

Prince bahoot hi sweet hai. Kala tikka laga dena...

Apne bahot sahi kaha ki kai baar humare khud ke bache hume bahoot simple si baat samjhate hai jo jante hue bhi humare ander kahin kho gai hai..

Keep writing here...

prince se jaan-pahchaan karna bahoot assan hai. aap use dekhkar muskra do, wo aap ko dekh kar muskara dega. fir aap kisi special style me hanso yani ke aankhon ko band karke. badle me aapko kuch vaisi hi NAKAL me hans ke dikhayega......
bas ab aap apne hath badakar use apani ungli pakada dijiye fir wo aapko us taraf le jayega jahaan usne kuch der pahle ek chidiya ko chah-chahate hue suna tha....
aur apni bhasha me aapko kuch samjhayega....
aur fir wahan mojzood sabhi log usaki is koot-bhasha ka apana-apana matalab nikalate hain..ki prince kya kahana chah raha hai.
in sabko apani baaatcheet me mashgool chod kar ye janab kutte ke bhonkane ki aawaz sunkar us taraf doud laga dete hain...
peeche se dadaji ki aawaz aati hai ..are use pakado bhai wo kahin gir gaya to... tum logon ko bachche ka dhyan rakhna nahi aata.....
itna sunna tha ki dadi ka palatwar .... are bachche humane bhi paida kiye hain aur unhe sikhaya padaya bhi hai ab is umr me inse sikhen hum bachche sambhalana...... 

celmira maine aapki baat prince ko batai hai aur usane bhi aapake liye kuch kahha hai.
yadi samajh saken to.......
aa.aaa .. ka kkkkkkkkkkkk. ooooooooooooo

welcome roja ji.......
prince ki duniya me aapka swagat hai..

Ek baar phir se Prince ki kahani ne muskurane pe majboor kar diya. Mujhe mythological history ka  to itna nahin pata, par haan Prince ka apni khushi ka izhar dance ki koshish karke achcha laga.

Prince ke agle kaarname ka intezar rahega