mohabbati full

ਮੁਹੱਬਤੀ ਫੁੱਲ
ਇੰਦਰਜੀਤ ਨੰਦਨ

ਮੌਸਮੀਂ ਨਹੀਂ ਹੁੰਦੇ
ਮੁਹੱਬਤੀ ਫੁੱਲ
ਨਾ ਹੀ ਰੁੱਤਾਂ ਦੇ ਮੁਹਥਾਜ
ਇਹ ਤਾਂ ਪਤਝੜਾਂ 'ਚ ਵੀ
ਮਹਿਕਦੇ, ਟਹਿਕਦੇ
ਹਵਾ ਦੀ ਛੋਹ ਨਾਲ
ਬਾਵਰੇ ਹੋ ਝੂਮਦੇ
ਮਹਿਬੂਬ ਦੀ ਮਹਿਕ
ਦੂਰ ਦੂਰ ਤੀਕ ਖਿੰਡਾ ਦਿੰਦੇ...

ਮੌਸਮੀਂ ਨਹੀਂ ਹੁੰਦੇ
ਮੁਹੱਬਤੀ ਫੁੱਲ
ਇਹ ਸੂਹੇ ਸੂਹੇ
ਕੋਸਾ ਚਾਨਣ ਨ੍ਹਾਤੇ
ਹੋਠਾਂ 'ਤੇ ਤ੍ਰੇਲ ਵਾਂਗ
ਲਰਜ਼ਦੇ, ਚਮਕਦੇ
ਖੁਸ਼ੀਆਂ ਵੰਡਦੇ
ਕੁੱਲ ਆਲਮ 'ਚ
ਮੁਹੱਬਤ ਦੇ ਰੰਗ ਭਰ ਦਿੰਦੇ

ਮੌਸਮੀਂ ਨਹੀਂ ਹੁੰਦੇ
ਮੁਹੱਬਤੀ ਫੁੱਲ
ਇਹ ਕਿਸੇ ਵੀ ਥਾਂ
ਕਿਸੇ ਵੀ ਪਲ਼
ਕਿਸੇ ਵੀ ਰੁੱਤੇ
ਕਿਸੇ ਵੀ ਰੁੱਖੇ
ਖਿੜ ਪੈਂਦੇ
ਜਦ ਸਾਹਵਿਓਂ ਆਉਂਦੀਆਂ
ਨਸ਼ਿਆਈਆਂ ਪੌਣਾਂ ਦਾ ਵੇਗ
ਭਰ ਦਿੰਦਾ ਪਰਾਗ
ਤੇ ਜੋਬਨ ਦੀ ਰੁੱਤ
ਫੁੱਲ ਹੀ ਫੁੱਲ ਕਰ ਦਿੰਦੀ ਚੁਫ਼ੇਰ
ਭਰ ਦਿੰਦੀ ਮੁਹੱਬਤ ਦੀ ਚੰਗੇਰ