ਸ਼ਰਾਬੀ ਆਸ਼ਿਕ

ਸ਼ਰਾਬੀ ਆਸ਼ਿਕ

ਇੱਕ ਇੱਕ ਘੁੱਟ ਵਿੱਚ ਸਾਨੂੰ ਰੱਬ ਨਜਰ ਹੈ ਆਉਂਦਾ।
ਜੇ ਪੀਵਾਂ ਨਾ ਅਗਲਾ ਘੁੱਟ ਤੇਰਾ ਦਰਦ ਸਾਨੂੰ ਸਤਾਉਂਦਾ।

ਪੜਕੇ ਕਲਮਾਂ, ਮੈਂ ਪੀਵਾਂ, ਲੈ ਕੇ ਮਾਸ਼ੂਕ ਦਾ ਨਾਂ
ਜੇ ਸ਼ਰਾਬ ਨੇ ਬਖਸ਼ਿਆ, ਜ਼ਿਭਾਹ ਕਰਨਗੀਆਂ ਤੇਰੀਆਂ ਸੱਧਰਾਂ
ਖਫ਼ਾ ਹੋਇਆ ਇੱਕ ਬੱਦਲ ਮੇਰੇ ਵਿਹੜੇ ਕਣੀਆਂ ਵਰਸਾਉਂਦਾ।

ਇਹ ਮੀਂਹ ਨਹੀਂ ਉਸ ਸ਼ਰਾਬੀ ਬੱਦਲ ਦੇ ਹੰਝੂ ਕਿਰਦੇ
ਬੇਹੋਸ਼ ਹੋਏ ਆਸ਼ਿਕਾਂ ਦੇ ਖੂਨ ਭਰੇ ਦਿਲ ਦਰਿਆ ਵਗਦੇ
ਮਾਰੂਥਲਾਂ ਦੀ ਰੋਹੀ ਦੇ ਵਿੱਚ ਜੰਗਲੀ ਫ਼ੁੱਲ ਖਿੜਾਉਂਦਾ।

ਸ਼ਰਾਬੀ ਫ਼ੁੱਲਾਂ ਦੀਆਂ ਪੱਤੀਆਂ ਵਿੱਚ ਕੰਡੇ ਖੁਭ ਜਾਣ
ਜਹਿਰ ਪੀਕੇ ਆਖਰੀ ਸਾਹ ਤਿਤਲੀਆਂ ਲੈਕੇ ਤਿਆਗ ਦਿੰਦੀਆਂ ਪਰਾਣ
ਉੰਨਾਂ ਮਰੇ ਹੋਏ ਭੌਰਿਆਂ ਨੂੰ ਕੋਈ ਖੱਫਣ ਨਹੀਂ ਥਿਆਉਂਦਾ।

ਬੋਤਲ ਹੋਈ ਖਾਲੀ ਠੇਕੇ ਦਾ ਦਰਵਾਜਾ ਵੀ ਬੰਦ ਹੋਇਆ
ਪਹਿਲੀਂ ਵਾਰੀਂ ਆਸ਼ਿਕ ਦਿਲ ਦਾ ਮਾਰਿਆ ਸ਼ਰਾਬ ਖੁਣੋਂ ਰੋਇਆ
ਉੱਚੀ ਅਵਾਜ ਵਿੱਚ ਦੁੱਖ ਦੀਆਂ ਨਜਮਾਂ ਤੇਰਾ ਨਾਂ ਲੈਕੇ ਗਾਉਂਦਾ।

By: Kaka Gill