mushkil hai apna mail priye

I am not aware of the writer of this poetry………..but its interesting Just …………Go Ahead … Enjoy

 

 

 

mushkil hai apna mail priye,

ye pyar nahin hai khel priye,

 

tum MA 1st division ho, main hua matric phel priye,

mushkil hai apna mel priye, ye pyar nahin hai khel priye,

 

  tum fauji afsar ki beti, main to kisaan ka beta hoon,

tum rabadi kheer malai ho, main to sookha sapreta hoon,

tum AC ghar mein rehti ho, main ped ke neeche leta hoon,

tum nayi maruti lagti ho, main scooter lambreta hoon,

is kadar agar hum chup-chup kar aapas me prem badhayenge,

to ek roz tere daddy Amrish Puri ban jaaenge,

sab haddi pasli tod mujhe bhijwaa denge vo jail priye,

mushkil hai apna mail priye, ye pyar nahin hai khel priye,

 

 

tum arab desh kee ghodi ho, main hoon gadahe ki naal priye,

tum deewali ka bonus ho, main bhookho ki hadtaal priye,

tum heere jadi tashtari ho, main aluminium ka thaal priye,

tum chicken-soop biryani ho, main kankad waali daal priye,

tum hiran-chaokadi bharti ho, main hoon kachhue ki chaal priye,

tum chandan-wan ki lakdi ho, main hoon babool ki chhaal priye,

main pake aam sa latka hoon, mat maaro mujhe gulel priye,

mushkil hai apna mail priye, ye pyar nahin hai khel priye,

 

 

main shani-dev jaisa kuroop, tum komal kanchan kaya ho,

main tan-se man-se Kanshi Ram, tum maha chanchala maya ho,

tum nirmal paawan ganga ho, main jalta hua patanga hoon,

tum raaj ghaat ka shanti march, main hindu-muslim danga hoon,

tum ho poonam ka taajmahal, main kaali gufa ajanta ki,

tum ho vardaan vidhata ka, main galti hoon bhagvanta ki,

tum jet vimaan ki shobha ho, main bus ki thelam-thel priye,

mushkil hai apna mail priye, ye pyar nahin hai khel priye,

 

 

tum nai videshi mixie ho, main patthar ka silbatta hoon,

tum AK-saintalis jaisi, main to bas desi katta hoon,

tum chatur Rabadi Devi si, main bhola-bhala Lalu hoon,

tum mukt sherni jungle ki, main chidiyaghar ka bhaalu hoon,

tum vyast Sonia Gandhi si, main V.P.Singh sa khali hoon,

tum hansi Madhuri Dixit ki, main policeman ki gaali hoon,

kal jail agar ho jaaye to dilwa dena tum bail priye,

mushkil hai apna mail priye, ye pyar nahin hai khel priye,

 

 

main dhabe ke dhaanche sa hun, tum paanch sitara hotel ho,

main mahue ka desi tharra, tum red-label ki botal ho,

tum chitra-haar ka madhur geet, main krishi-darshan ki jhaadi hoon,

tum vishva-sundari si kamaal, main theliya chaap kabadi hoon,

tum sony ka mobile ho, main telephone waala chonga,

tum machhli maansarovar ki, main hun saagar tat ka ghongha,

dus manzil se gir jaaooga, mat aage mujhe dhakel priye,

mushkil hai apna mail priye, ye pyar nahin hai khel priye,

 

 

tum satta ki maharani ho, main vipaksha ki lachaari hoon,

tum ho mamta-Jailalita si, main kwara Atal-Bihari hoon,

tum Tendulkar ka shatak priye, main follow on ki paari hoon,

tum getz, matiz, corolla ho main Leyland ki lorry hoon,

mujhko refree hi rehne do, mat khelo mujhse khel priye,

mushkil hai apna mel priye, ye pyar nahin hai khel priye,

main soch raha ki rahe hain kabse, shrota mujhko jhel priye,

mushkil hai apna mail priye, ye pyar nahin hai khel priye

 

He hehehehehe accha laga aapne saath diya.....

sach main mujhe to maza aagaya that phad ke t maine soncha aap sabse share karun. pata nahi kisne likhi par likhi mast hai......

roja tumhe dekha kar accha laga...

hahaha superb janab!!!!