third division by Syed Mohammad Jafri

Jeenay ki kashmakash me na bay-kaar daliye,
Main third divisioner hoon, mujhay maar daliye,

Phir naam apni qaum ka memaar daliye,
Degree ko meri lijiye, achaar daliye,

Kuch qaum ka bhala ho tø kuch aapka bhala,
Mera bhala kuch meray maa'n baap ka bhala,

Jata hy jis jagah b koi third divisioner,
Kehtay hain sab k aa gaya tu kis liye idhar,

Tu chal yahan say, teri na hogi yahan guzar,
"Loh-e-jahan pay harf-e-mukarar hoon main" magar,

"Ya RABB zamana mujh ko mitata hy kis liye,"
Har shakhs mujhko aankh dikhata hy kis liye,

Pass ho gaya hoon main magar phir b fail hoon,
Taleem k idaaron k hathon me khail hoon,

Jiska nishana jaye khata woh ghulåil hoon,
Main khaak me mila hua mitti ka tail hoon,

Aur university b nahi koi refinery,
Surat b taseefay ki nahi koi zaheri,

Akhbaar me dekha tø mujh par hua ayaan,
Hotay hain pass woh b na dain jo k imtehaan,

Yani k honorary b milti hain degreeyan,
Main jis zameen pay pohancha waheen paya aasmaan,

Hy aasmaan ki gardish-e-taqdeer meray saath,
Degree hy ik gunahon ki tehreer meray saath,

Gar ho sakay tø maang loon ik umar ko udhaar,
Aur imtehaan jis ka nahi koi aitebaar,

Iss imteha'n ki baazi lagaon ga baar baar,
Kehtay hain løg iss ko ye machhli ka hy shikaar,

Ye imtehaan machhli phansanay ka jaal hy,
"Aalam tamam halqa-e-daam-e-khayaal hy..."

bahut khoob

very nice