Aah Ko Chahiye Ik Umr Asar Hone Tak

Aah Ko Chahiye Ik Umr Asar Hone Tak
Kaun Jeeta Hai Teri Zulf Ke Sar Hone Tak

Daam Har Mauj Main Hai Halqa-E-Sadkaam-E-Nahang
Dekhe Kya Guzre Hai Qatre Pe Gauhar Hone Tak

Aashiqi Sabr-Talab Aur Tamanna Betaab
Dil Ka Kya Rang Karun Khoon-E-Jigar Hone Tak

Ham Ne Maana Ke Tagaaful Na Karoge Lekin
Khaak Ho Jaayenge Ham Tum Ko Khabar Hone Tak

Partav-E-Khoor Se Hai Shabnam Ko Fanaa Ki Taalim
Main Bhi Hoon Ek Inaayat Ki Nazar Hone Tak

Yak Nazar Besh Nahin Fursat-E-Hasti Gaafil
Garmi-E-Bazm Hai Ik Raqs-E-Sharar Hone Tak

Gam-E-Hasti Ka ‘Asad’ Kis Se Ho Juz Marg Ilaaj
Shamma Har Rang Main Jalti Hai Sahar Hone Tak

Aamad-E-Khat Se Hua Hai Sard Jo Bazaar-E-Dost
Dud-E-Shama-E-Kushta Tha Shaayad Khat-E-Rukhsaar-E-Dost

Ai Dil Naa-Aaqabat Andesh Zabt-E-Shauq Kar
Kaun La Sakta Hai Taab-E-Jalwa-E-Deedar-E-Dost

Khana Viransaazi-E-Hairat Tamasha Kijiye
Surat-E-Naqsh-E-Qadam Hoon Rafta-E-Raftaar-E-Dost

Ishq Main Bedaad-E-Rashq-E-Gair Ne Maara Mujhe
Kushta-E-Dushman Hoon Aakhir Garche Tha Beemaar-E-Dost

Chashm-E-May Roshan Ke Us Bedard Ka Dil Shaad Hai
Deeda-E-Pur-Khoon Hamaara Saagar-E-Sar-Shaar-E-Dost

beautiful!