Chahiye Achchon Ko Jitna Chahiye

Daayam Pada Hua Tere Dar Par Nahin Hoon Main
Khaak Aisi Zindagi Pe Ke Paththar Nahin Hoon Main

Kyun Gardish-E-Mudaam Se Ghabara Na Jaaye Dil
Insaan Hoon, Pyaala-O-Saagar Nahin Hoon Main

Yaarab! Zamaana Mujh Ko Mitaata Hai Kis Liye
Lauh-E-Jahaan Pe Harf-E-Mukarrar Nahin Hoon Main

Had Chahiye Sazaa Main Uqubat Ke Waaste
Aakhir Gunaahgaar Hoon, Kaafir Nahin Hoon Main

Kis Waaste Aziz Nahin Jaante Mujhe
Laal-O-Zumarud-O-Zar-O-Gauhar Nahin Hoon Main

Rakhte Ho Tum Qadam Meri Aankhon Se Kyun Dareg
Rutbe Main Mahr-O-Maah Se Kamtar Nahin Hoon Main

Karte Ho Mujhko Manaa-E-Qadam Bos Kis Liye
Kya Aasmaan Ke Bhi Barabar Nahin Hoon Main

‘Ghalib’ Wazifaa Khwaar Ho, Do Shaah Ko Dua
Wo Din Gaye Ki Kahte The “Naukar Nahin Hoon Main”