Aa ! dard yahaN se chaltay hen (by ......)

Aa ! dard yahan se chaltay hen
Is shehr-e-sittam se door kahin
Ab yun bhi nahi hum jaa na saken
Majboor sahi, maazoor nahi

Ab phir na dhalay ga geeton men
Tu ne tu qasam bhi khaai hay
Ye nazm likhi hay phir se ku?
Kya sharm na tujh ko aai hay?

Ab phir se yahaN per deray ku?
Kis baat ne tujh ko roka hay?
Jo wajeh hay such such batla de
Ye geet, ghazal sub dhoka hay

Kya tujh ko ye ab bhi lagta hay?
Wo laut k phir se aayay ge?
Sadiyon se jo tujh ko bhool gai
aankhoN pe tujhay bithlayay ge?

Ab phir se wohi ummeeden ku?
Her baar tujhay samjhaatay hen
Jo chhor he jaatay hen aakhir
Kab laut k phir wo aatay hen?

Is bazm ki jhooti duniya ko
Wo chhor gai, tu phir hay yahin
Aa ! dard yahan se chaltay hen
Is shehr-e-sittam se door kahin
......

..............

waah janaab waah kyaa baat hai bahut khoobsurat qalaam hai, dheron daad.
 
 

Mohtaram Iftakhar Ahmad Sahab! salam

pazeerai per shukr guzaar hen... aap ki chand ghazlen, hamari nazar se guzreen... mashallah buhat khoob sher keh rahay hen aap...

ek bar phir shukria k sath
dua-go

:]:

:]:

:]:

Mohtaram qadeer_junaid sahab! salam

yunhi bus kuch khayal aya tu aik nishist men he likh gayay... yaqeenan is men kaafi kami/kotaahi ho gi... hum khud tu is kaavish se dobara nazren milanay ki himmat nahi ker sakay..

aap ne yaqeenan is kawish k aib bayan karnay se parda poshi ikhtiar farmai hay.. is per bhe aap k shuker guzaar hen..

dua-go