Galatiyaa hoti hai, hone do

Kuch sikhna hai to kuch karne do,
Gar galatiyaa hoti hai, hone do,
Galatiyo ko kyu roke pagle?
Rokne se ye nahi rukti,
Jo rokega inhe khud ruk jaayega,
Waqt behta dariya hai beh jaayega,
Haath na tere kuch aayega,
Tu hai waisa hi reh jaayega,
Is waqt ke behte dariye me khud ko bheeg jaane do,
Kuch sikhna hai to kuch karne do,
Gar galatiyaa hoti hai, hone do,

Na maayne samjhe tujhe kabhi,
Na samjhi kisi ki samajh,
Ab samajh, samajh ke kyaa samjhega?
Tu hai jo itna nasamajh,
Laakh koshishe karke bhi tu na samjhega wo samajh,
Jo samajh samajhti hai aakhir kaisi hoti hai samajh,
Is nasamajhi ke khud me tum thodi samajh aane do,
Kuch sikhna hai to kuch karne do,
Gar galatiyaa hoti hai, hone do,

Koi nahi kahega ke tu hai kitna bhala insaan,
Koi nahi puchega raasta mushqil tha ya aasaan,
Koi nahi tera duniyaa me,
Tu khud hi khud ka reh jaayega,
Koi nahi saath chalega, koi nahi bataayega,
Kyaa chiz hai ye zindagi?
Tu khud hi samajh jaayega,
Is zindagi ki raaho me khud ko akela chalne do,
Kuch sikhna hai to kuch karne do,
Gar galatiyaa hoti hai, hone do,

Kar gile, shikve bhi kar,
Tu kar shikayat har kisi se,
Tu kar wo sab jo dil kahe,
Tu kar tawakko bhi sabhi se,
Jab toot jaayegi, Uth jaayegi,
Jo tawakko ki thi sabse,
Fir na kabhi wapas aayegi,
Laut kar dil me firse,
Ye karna na rokna tab tak,
Jab tak na samjhe khudi se,
Wajood khudi ka khud tu bhi nahi,
Fir tawakko kyaa kisi se,
Jab mit jaayegi ye tawakko,
Mitenge gile sabhi se,
Jo bhi hota hai use ho jaane do,
Kuch sikhna hai to kuch karne do,
Gar galatiyaa hoti hai, hone do,