Turiyateet awastha manateet wa maayateet awastha hai

Kaam,krodh,lobh,hinsa ye adhogati aur agyaani ke lakshan hain. Ye teesri wa sabse nichli shreni me aate hain. Aise manushya daya ke paatra hain kyunki manushya hote hue bhi manushyata se gir gaye. Inhe deen mazhab dharma adhyaatm se kuch lena nahi hota inse jitni gyaan ki charcha ki jaaye vyarth hai kyunki ye wishay sukh hi jiwan saar samajhte hain. Inse doosron ka sukh nahi dekha jaata aur doosron ko kasht dene ke liye kisi bhi had tak gir jaate hain. Inhe naastik kaha ja sakta hai ye taamsik prakrati wa pravatti ka lakshan hai. Doosri shreni ke manusanya aastik hote hain. Dharm ki baaton ko mahatv dete hain vrat upwaas bhi rakhte hain parantu gyaan maarg par chal nahi paate haan dhaarmik reeti riwaajon parampara ka nirwahan karke santusht ho jaate hain. Inke liye doosron ke ahit se zyaada swayam ka hit maayne rakhta hai. Ye raajsik prakrati wa pravatti ka lakshan hai.Pehli shreni ke manushya saatvik pravatti ke hote hain wa manushyata se upar uthkar bhagwat tatv tak pahuchne ki cheshta karte hain. Ye gyaan maarg par sada chalte hain aur yadi bhakti maarg chunte hain to usme bhi eeshwar ke prati ahobhaav rakhte hain. Ye saral chitt ke hote hain wa akaaran hi sabka hit karte rahte hain yahan tak ki apna ahit karne walon ka bhi hit hi chahte hain. Parantu ye bhi is triguni maaya me hi rahte hain. Parantu hume is baat ka dhyaan rakhna hoga ki satvagun hamaare me zyaada badhe athaart manushyata se upar uthne me hi jiwan ka saar hai atah sadaiv aage badhne ke liye prayaasrat hona chahiye aur glaani wa kuntha se khud ko nahi bharna chaahiye. Jaise jaise satvagun badhta hai wyakti adhyaatm ki yaatra me sudradh hota jata hai,uska ahankaar mit.ta jata hai aur wo Eeshwar ko tatva se jaanna shuru karta hai aur man-budhhi ke tal se uthke swayam ko aatma jaanna shuru karta hai. Dhyaan ke dwaara ye tureeyateet athar uprokt teeno shreni se paar nikal jaata hai. Ye turiyateet awastha hi manateet athwa mayateet awastha hai.

nice thoughts

nice suvichar