ishq ishq ho shaayad husn me.n fanaa ho kar

ishq ishq ho shaayad husn me.n fanaa ho kar
intihaa hu.ii Gam kii dil kii ibtidaa ho kar

dil hame.n hu.aa haasil dard me.n fanaa ho kar
ishq kaa hu.aa aaGaaz Gam kii intihaa ho kar

naa-muraad rahne tak naa-muraad jiite hai.n
saa.ns ban gayaa ik ek naala naa-rasaa ho kar

ab hu.ii zamaane me.n sheva-e-vafaa kii qadr
aalam-aashnaa hai vo dushman-e-vafaa ho kar

aur bande hai.n jin ko daava-e-KHudaa.ii hai
thii hamaarii qismat me.n bandagii KHudaa ho kar

umr-e-KHizr ke andaaz har nafas me.n paataa huu.n
zindagii na.ii paa.ii aap se judaa ho kar

ba.Dhtaa hai na ghaTtaa hai marte hai.n na jiite hai.n
dard par KHudaa kii maar dil me.n rah gayaa ho kar

kaar-gaah-e-hasrat kaa hashr kyaa hu.aa yaa rab
daaG-e-dil pe kyaa guzrii naqsh-e-mudda.aa ho kar

ishq se hu.e aagaah sabr kii bhii had dekhii
KHaak me.n milaa doge der-aashnaa ho kar

kii qazaa-e-mubram ne zindagii kii Gam-KHvaarii
dard kii davaa pahu.nchii dard be-davaa ho kar

zindagii se ho be-zaar 'faanii' is se kyaa haasil
maut ko manaa loge jaan se KHafaa ho kar

https://rekhta.org/

Nihaayat umdah Rekhaa Jee, dheron daad.