aaj tujh ko jo falak par hain bithaane waale (zarraa)

aaj tujh ko jo falak par haiN bithaane waale
dekhna kal wahee aaNkhhoN se giraane waale

aaj uth’te haiN jo seene se lagaane ke liye
saNg ik roz wahee haath uthaane waale

log do chaar baha deNge ashk bhi do chaar
tujh se kitne haiN gaye kitne haiN aane waale

in parivash ko kabhi aaeenaa-e-dil n dikha
aks bas dekh ke apna haiN ye jaane waale

dil ki mehmaan-nawaazi to ye kar leNge qabool
ghar n apna ye kabhi ismeiN basaane waale

hum n jab hoNge tere dil ko dukhaane ke liye
yaad aayeNge wo ro ro ke manaane waale

har gile par tere duniya se adaawat bhi kareiN
har adaa par bhi haiN sar phorh’te jaane waale

phir uthaate huwe sar aankh pe paaoge humeiN
jitna bhi keh leiN sitam ab n uthaane waale

zindagi ne bhi humeiN kya se bana kya hai diya
ab n itne bhi bure lagte zamaane waale

wo bulaate hi naheeN haiN to ye kehta maiN phirooN
hum bulaane se kahaaN laut ke aane waale

phir kahaaN paayeNge aagosh-e-sanam meiN ye sukooN
rab! salaamat raheiN ye jee jo jalaane waale

har ahed yooN bhi n hota hai nibhaane ke liye
yooN bhi hote n sabhi ahed nibhaane waale

mujh se kyooN poochhh rahe ab ho sabab bikne ka
mujh ko baazaar ka r’sta o! dikhaane waale

tujh se maine thi kari chaaraagharee ki ummeed
haal par mujh ko mere chhorh ke jaane waale

zikr bhi tark-e-wafaa ka n gawaaraa hai tujhe
khaar raah-e-wafaa ke roz ginaane waale

ab bulaayeiN bhi to kis muNh se jinheiN door kiya
unki khaatir jo kabhi paas n aane waale

baat “zarraa” ko hi kuchh karni parhegi ab to
baat karte hi naheeN baat banaane waale

- zarraa

 

 

 

Zarraa Ji..Har Ek As'haar Samundar ki Gehrai Liye Hue Hai..bahut Kam Hi Mujhe Yoindia Mein Aise Kalaam Padhne Milte Hai..

Bahut Bahut Aur Bahut Khoooooooooob!!!!

bahut khoob , zarra saheb .

zarra  saheb . bahut  achhi  ghazal  hai . lekin  main   bhi
aapko  yahi  salaah  dena  chahunga  ki  itni  lambi   ghazal
ki  jagah  aap  2  ya  3  ghazlon  mein  break  kar  ke  pesh
karein   to   itne   khubsurat   ashaar   zyada  tawajjo  aur
dilchaspi  se  parhe  jaayeinge.

 

 

very nice 

khwaish ji .... ye bas apki inayat hai ki apne is qadar pasand kari ye ghazal. apki daad sar ankhon par aur apka tah e dil se shukriya.

bahaut bahaut shukriya qais ji