sawaaloN ke aage jhuke ja rahe haiN - ZARRAA

sawaaloN ke aage jhuke ja rahe haiN
jawaaboN ko ruswa kiye ja rahe haiN


barhe azm se soo-e-manzil the nik’le
n jaane kidhar ab chale ja rahe haiN

(azm = resolve, soo-e-manzil = towards the destination)


bure bhi naheeN haal itne shahar ke
ke hakim tarak’kee kare ja rahe haiN


khizaaN jaayegee kyooN bhalaa baaghbaaN jab
bahaaroN pe tohmat dhare ja rahe haiN


karam kaash itne n farmaate hum pe
sitam un ke kitne barhe ja rahe haiN


parhe saNg the pesh-goyee pe jin ki
ayaaN wo hi manzar huwe ja rahe haiN

(saNg = stones, pesh-goyee = foretelling, ayaaN = clear / manifest)


unheiN dete ikhlaas ka waasta hum
himaaqat ye kaisee kiye ja rahe haiN

(ikhlaas = sincerity, himaaqat = blunder)


rafeeqoN se nazreiN bhala kyooN milaate
lagaaye adoo ko gale ja rahe haiN

(rafeeqoN = friends / associates, adoo = enemy)


diye ashq aur haal shafqat se poochha
n ro bhi sake hum haNse ja rahe haiN

(shafqat = kindness)


yahaaN hai n koyee siwa bekasi ke
siyah saaye kis ke bardhe ja rahe haiN

(bekasi = friendlessness, siyah = dark)


jiye ja rahe just’joo meiN usee ki
taman’na meiN kaise mare ja rahe haiN

(just’joo = quest)


tera husn phir jaavedaaN kyooN n hota
ushaaq umr bhar jaan se ja rahe haiN

(jaavedaaN = eternal, ushaaq = lovers)


haiN mizhghaan-o-abroo udhar taak meiN aur
idhar taak par dil rakhe ja rahe haiN

(mizhghaan = eyelashes, abroo = eyebroo)


sunee ja rahee ik sadaa misl-e-koyal
ke maanind-e-gul lab khule ja rahe haiN

(sadaa = voice, misl-e = similar to, maanind = like)


tere haath hai bhar n bhar jaam saaqee
n ye zakhm jo khud bhare ja rahe haiN


akelee hi ab tu jalaa karna sham’ma
ke mehfil se “zarraa” uthe ja rahe haiN


- ZARRAA

nice,sir