TALAASH HAI ......ZARRAA

sahir ludhianvi ki mashhoor ghazal "na to kaarwaan ki talaash hai" ki zameen par ghazal kehne ki meri shikastah koshish maazrat ke saath pesh hai ...

na to manziloN ki gharaz* koyee na hi rehguzar ki talaash hai
jahaaN sarf* ho meri justajoo* mujhe us safar ki talaash hai
(gharaz = motive, sarf = expend, justajoo = quest)

jo naheeN hai shaane* pe sar tera to nigaah bhar ki talaash hai
jo naheeN rasaaee* hai baam* tak to bas ik dagar ki talaash hai
(shaane = shoulder, rasaaee = reach, baam = terrace of house)

jo chamak raha raha tere chehre pe wo meri tamanna ka noor* hai
jo jhalak rahi teri aaNkh meiN wo meri nazar ki talaaah hai
(noor = light)

mujhe shauq-e-parwaaz* hai magar hai bulandiyoN ki hawas naheeN
mujhe taNg* lagta zameeN ka ghar so falak ke dar* ki talaash hai
(shauq-e-parwaaz = passion of fllying, taNg = small/narrow, falak = sky, dar = door)

mujhe apna koocha jaNcha naheeN to dayaar-e-ghair* meiN aa gaya
ke yahaaN se jaaooN kahaaN ko maiN ye mujhe kidhar ki talaash hai
( dayaar-e-ghair = foreign abode)

haaN mere bhi ghar meiN haiN haajateN* haaN mere bhi dil meiN haiN chaahateN
maiN kahaaN hooN tum se juda mujhe bhi guzar-basar* ki talaash hai
(haajateN = needs, guzar-basar = means of sustenance)

ye na poochh kyooN bekal* is qadar ye na poochh kis ka hooN muntazir*
ye pata hai jhoothee udee hai wo par usee khabar ki talaash hai
(bekal = anxious, muntazir = waiting for)

ya ke rog hi hai ye la-dawa* ya ke hai n taqdeer meiN shifa*
jo bata de "zarraa" ke sach hai kya usee chaaraghar* ki talaash hai
( la-dawa = beyond treatment, shifa = healing, chaaraghar = doctor)

- zarraa

 
Beautiful effort. DAAD-O-MUBARAKBAD.
-Arun Mishra.

Bahot achey, bahot khoob waaah waah