zarraa .... dard lagta dawa ke jaisa hai

ik nayee inteha* ke jaisa hai
dard lagta dawa ke jaisa hai

zakhm jaise gul-e-bahaar koyee
soz* baad-e-saba* ke jaisa hai

maiN na dair-o-haram* ko jaata hooN
tera chehra dua ke jaisa hai

mera ahd-e-wafa* bhi naazuk hai
kuchh ye teri ana* ke jaisa hai

jis ko pehle ada samajhte the
ab wo fitna* khata ke jaisa hai

jab chukaane ka waqt aayega
faiz* un ka saza ke jaisa hai

le humeiN ja raha kahaaN girdaab*
ye humeiN nakhuda* ke jaisa hai

yooN to parbat hai baar-e-hasti* par
chhorh do to hawa ke jaisa hai

ab maiN be-fiqr ho ke sota hooN
mera rutba gada* ke jaisa hai

dasht* meiN "zarra" ug raha hai babool
ye tere naqsh-e-pa* ke jaisa hai

- zarraa

*
inteha = height
soz = burnung
baad-e-saba = morning breeze
dair-o-haram = places of worship
ahd-e-wafa = promise of faithfulness
ana = ego
fitna = mischief
faiz = favour
girdaab = whirlpool
nakhuda = boatman
baar-e-hasti = burden of existence
gada = beggar
dasht = desert
naqsh-e-pa = footprint

Rau ke sath sawagat hai aapka..