zarraa ... imtehaan hota rahe

mujh ko ye itmenaan hota rahe
ke mera imtehaan hota rahe

zindagi khushgawaar ho ke n ho
par khushi ka gumaan hota rahe

ishq khushfahmiyoN meiN dooba rahe
husn yooN mehrbaan hota rahe

hum zameeN waaloN ko zameeN hi bahut
hai koyee aasmaan hota rahe

shart ye rehm ki hai naamanzoor
sar jhuka gham bayaan hota rahe

kos lo laakh zindagi ko magar
ji rahe ho to maan hota rahe

do n masroofiyat ki rishwat inheiN
naunihaaloN ka dhyaan hota rahe

koyee kona to pyaar ka chhorho
ik numaaish makaan hota rahe

aisa eemaan shahr meiN laao
jis se amn-o-amaan hota rahe

jab bhi mauka ho kadwi baatoN ka
“zarraa” tu bezubaan hota rahe

- zarraa

  :clap:bahut khoob