bheegi HAWAAYEN...!!

bheegi-bheegi wo hawayen,
roz mere,
paas aayen,
kaan me kuch gungunati.

door baagon se guzar kar,
jab humare khet saare,
lahlahayen,
yaad aati.

chal pade purab disha se,
jal bhare badal jab,
bheegti chidiyan jahan hoN,,
pankh apne farfarati.

aaj mujhko lag raha hai,
jaise ki in,
attalikaon ki chaton par,
bheegti ye tankiyan,
kuch keh rahi hain.

door parwat ke shikhar,
wo waadiyan,
wo khet sookhe aur nadiyan,
bheeg jane ke liye hi beh rahi hain.

main bhatakta phir raha yun,
intt patthar se bane,
in jangalon me,
aur unme bas rahe insaan,
pattharon se bhi badtar,
ek andhar se bhari is sansani ne,
kaan me jyun kuch kaha hai.

ab na jane,
beh rahi yah,
kaun si,
kaisi hawa hai?
wo bhigoegi dilon ko,
ya sukhayegi kahin,
wo prem,
jo thoda bacha hai.

aaj mere ghar ki khidki,
jo lagi us paschimi diwar par hai,
khadkhada ke gir padi hai,
aur mere paaun,
jyun nischest,
phir se chal pade hain,
door kheton ko,
jahan bheegi hawayen,
aaj bhi kuch gungunati,
kaan me kuch keh rahi hain...

very nice

beautiful creation

Thank u, sir ji...

Thank you mate...