is baar saawan me fir.............

is baar sawan me fir wo thuth
sayad hara bhara ho jaayega
har daali pe patte ug aayenge
fir wo bhi mast hawa me lehrayega
naa jaane kitne pakshiyo ko
ek naya aasiyana mil jaayega
kitne bachho ko bachpane ka
ek manmana tohfa mil jaayega
gali k har majnu har aasiq ko
nayan matakke ka naya thikana mil jaayega
ek arse se khaamosh jung khaayi budi haddiyo ko
baatien banane ka naya bahana mil jaayega
na jaane kitni hi bhooli bisri baatien
fir logo ke jehan me aayengi
to kahi koi kissa purana
bhare jakhm ko taaja kar jaayega
kuchh aankhien nam hongi
to koi man hi man muskaayega
in mili juli bhaawnao k beech
ek thuth ko naya jeevan mil jaayega
neeche ki uski dali pe
koi bachchha jhula kahi lagayega
un nanhe bachho ki baato pe
wo thuth bhi thahake lagayega
baith k uski daali pe
koi koyal kahi kukegi
to kahi koi nar apni mada ki khaatir
unchi taan me gaayega
uski daali daali jhumegi
aur patta patta gaayega
is sawan me thuth sayad
fir se hara bhara ho jaayega
in sab k beech wo thuth naa jaane
kitni hi baato ka kitni yaado ka
chori chhupe hui mulakato ka gawah ban jaayega
aur in saare palo ko wo amar kar jaayega
kya pata kal hum kahaa ho
aur jab wapas yahaa aaye to
ye thuth ho na ho
par yaado me ye thuth har din aayega
agar sukh jaayegi kabhi man ki koi daali
to ye us daali ko aado se hara bhara kar jaayega
is baar sawan me fir wo thuth
sayad hara bhara ho jaayega
uski daali daali jhumegi
aur patta patta gaayega
is baar saawan me fir wo thuth...
sayad hara bhara ho jaayega
ANAND KUMAR"APRIYA"

shukriya mamta ji....yahaa aakar bada achchha lagta hai ajb apni kavitao pe comments padhta hu....lagta hai saari mehnat sarthak ho gyi......