-------/// Mera Bharat Mahaan Hai ///------

pyaar, mohabbat aur dard .... bas inhi vishayon pe likhta hoon main... socha is baar kuch alag likhne ki koshish karun...


bachpan me kabhi suna tha ki mera bharat mahaan hai,
aajkal koi ye nahi kehta ki sach mein desh mahaan hai,

bhool k jung san sattawan ki bhool gaye sab balidaan hai,
dharm k naam pe baant k aaj ek bharat ek pakistan hai,

kal tak ye suna tha ki hamara ek hi hindustan hai,
aaj usi ke tukde hoke koi punjab koi rajasthan hai,

aaj dharm k naam pe uth raha har taraf toofaan hai,
koi hai hindu, koi hai sikh, koi hota musalman hai,

koi bible, koi bhagwat geeta , kisi ka naam quraan hai,
kehne ko sab kitaaben hain par sabka alag alag naam hai,

dharam k naam pe bhed bhaw q karta aaj insaan hai,
ek gagan k niche hi rehte, sabka ek bhagwaan hai,

insaano k khoon ka pyaasa ban gaya aaj insaan hai,
kal tak jisko nar kehte the aaj bana haiwaan hai,

kal tak naari maata thi, aaj karte uska apmaan hain,
zulm-o-sitam wo seh nahi paati, deti wo apne praan hai,

takshashila naalanda tha kal, aaj yahaan agyaan hai,
pita ki jama punji ko lutana aaj bachcho ki shaan hai,

chhote me kabhi suna tha humne maata pita bhagwaan hain,
aaj vriddhashram me rakhte hain unko aise to santaan hain,

bin vyaahe hi maa ban jaati aaj ki naari mahaan hai,
pyaar k naam pe chhal karna aaj k yuva ki pehchaan hai,

kahin pe chori, kahin pe loot, kahin pe qatl-e-aam hai,
aasmaan me khauff k baadal subah se lekar shaam hai,

kahin pe bhasha, kahin pe jaati, kahin dharm k naam hai,
aaj insaano k zulm ka shikaar hota sirf insaan hai,

kabhi kabhi to sochta hoon main ki badal gaya insaan hai,
itni nafrat, itna vinaash, usi ka to pramaan hai,

aaj nafraton ki aag me dekho jal raha hinduatan hai,
aap hi kaho main kaise kahun ki mera desh mahaan hai...

Wah wah Kapil ji apne vichar bade achhe tareeqe se is kivita mein zahir kiye hain. Bahot khoob.

bahut bahut shukriya Neel ji... maine itni achchi ye kavita nahi likhi hai jitni jyaada aapne iski taarif kar di hai... bahut jyada taarif kar diya aapne hamare is kavita ki... bahut bahut shukriya Neel ji.

same here... I also love my country... aur aapki condition main samajh sakta hoon... bahut mushkil hota hai apne desh ko chhodke itne lambe time tak bahar rehna paraye mulk me... kabhi dil kare to aap aana jarur laut k apne ghar apne desh...

Sabse pehle to main tahe dil se aapka shukriya adaa karna chahunga Tamanna ji ki aapne hamari kavita k liye apne keemti waqt me se thoda sa waqt nikala aur ise padh k ise pasand kiya. Aagr meri ye koshish aapko achchi lagi to mere liye isse khushi ki baat kya ho sakti hai. bahut bahut shukriya Tamanna ji. bahut bahut shukriya.

Ab baat aati hai hamari un lines ki jisme maine aaj k naari ki mahaanta k baare me likha hai. Aapne shayad dhyaan nahi diya ya shayad main hi dhang se nahi likh paya. Darasal dusri line me maine aaj k purush ki hi taarif ki hai. Pyaar k naam pe aaj ka purush chhal karta hai tabhi to aaj ki naari mahaan banti hai. Taali na to kabhi ek haath se baji thi na kabhi bajegi...

bin vyaahe hi maa ban jaati aaj ki naari mahaan hai,
pyaar k naam pe chhal karna aaj k yuva ki pehchaan hai...

Is second line me "Yuva" ki jagah agar "purush" likh deta hoon to aapki ichcha poori ho jaati hai. Par chhal to ladkiyaan bhi karti hai aajkal pyaar k naam pe....

Ek baar fir se aapka shukriya adaa karna chahunga main Tamanna ji. Bahut bahut shukriya.

bahut bahut shukriya Riyaz ji... !!!

Thanks a lot again Neel ji... sach kahaa aapne koi cheez jab dur ho tabhi uski importance samajh me aati hai... main bhala aapka dard kaise samajh paunga... aapka dard aap hi behtar samajh sakte hain... koshish ki hai jahan tak main aapke dard ko samajh paaya usey kuch shabdon me utaarne ki.... jaane aapko pasand bhi aayega ki nahi....

jinme mera bachpan beeta, aaj wo galiyaan yaad aati hai,
jinme mera yowan beeta, aaj wo ghadiyaan yaad aati hain,

jin pedo ki shaakhon me hum bachpan me khela karte the,
un shaakhon ki yaad me ab hum aksar roya karte hain,

peele sarso k kheton ki wo khushboo humko yaad aati hai,
maa k haath k bane khaane ki aaj bhi humko yaad aati hai,

chhoot gaya wo bachpan mera, chhoot gayi wo jawani meri,
chhoot gaya wo aangan mujhse, chhoot gaya mera desh bhi mujhse,

apne ghar jaane k liye ab barso se hum taras rahein hain,
desh hai mera bharat pyara jiske liye hum tadap rahe hain,

kaash koi farishta aaye, mujhko mere ghar le jaaye,
mere hothon ki muskaan wo mere hothon ko de jaaye....

bahut bahut shukriya Khwaish ji... haan sach hai ye topic chubti hui hi hai... par yahi aaj ki sachchai hai... har taraf aisi hi mahaanta k gungaan hai... ek baar fir se aapka shukriya ada karna chahunga ki aapne hamari kavita ko apna waqt diya... bahut bahut dhanyawaad...!!!