Great Urdu Poets And Their Poems

             CHUP
             - a nazm by Mehr Lal Soni Zia Fatehabadi

Kalii se yun kahaa baad e sahar ne

Tujhe paalaa hai aaghosh e qamar ne

Sitaare raat bhar gaate rahe hain

Tujhe giiton se bahalaate rahe hain

Ghataa tere liye paimaanaa bar kaf

Tu khud ik saaqii e maykhaanaa bar kaf

                   Baharen jis pe naazaan hain vo tu hai
                   
                   Gulistaan jis se khindaan hai vo tu hai

Kalii ne jab sunii taariif apnii

To vo baad e sahargaahii se bolii

Hai bilkul thiik jo tu kah rahii hai

Labon se tere gangaa bah rahii hai

Chaman kii zindagii hun jaan hun main

Chamanwalon kaa diin iimaan hun main

                       
                      Kalii ye kahate kahate ho gaii chup

                      Nasiim e subah ne bhii ssadh lii chup


                     ---0---

                 NAI SUBAH
   
    - A nazm by Mehr Lal Soni Zia Fatehabadi

Bahut jaa chukii hai shab e tiirah saamaan

Ujaalon ke saae ufak par hain raqsaan

Vo taaraa, yahii to hai taaraa sahar kaa

Yqiinan nahin is mein dhokaa nazar kaa

Bahut so chukaa main, bahut ho chukaa gum

Mujhe loriyaan ab hawaao na do tum

Mujhe niind kuchh raas aaii nahin hai

Ki raahat mere paas aaii nahin hai

Bade zabt se gham uthaayaa hai maine

Andheron mein sab kuchh lutaayaa hai maine

Ummiid e tullu e sahar ke sahaare

Hawaadis ke tuufaan hai sar se guzaare

Magar sabr kaa jaam ab bhar chukaa hai

Ummiidon kaa jaaduu asar kar chukaa hai

Main takhariib kii kuvvaton se laduungaa

Zamaane ko taamiir kaa dars duungaa

Uthaauungaa sar par falak ko fugaan se

Zamin par girenge ye mahal aasmaan ke

Puraane butaan e haram tod duungaa

Main tahziib e insaan kaa rukh mod dungaa

Khudaa kaa bharam khol dungaa jahaan par

Yaqiin kaanp jaaegaa mere gumaan par

Ye zarre jo sadiyon se raunde gae hain

Hiqaayat kii nazaron se dekhe gae hain

Nae aaftaabon ko phir janam denge

Luteron se phir apnaa haq chhin lenge

Ye zulmat kii haibat dilon se mitegii

Zamaane ko karavat badalnii padegii

Nahin duur ab to nazar aa rahii hai

Utho, dosto vo sahar aa rahii hai

             ---0---

                     MAIN
   - A nazm by Merhr Lal Soni Zia Fatehabadi

Jab takhayyul mein sukuun kaa shayabaa paataa hun main

Aatish e nagmaat kii takhaliiq farmaataa hun main

Qalb e giitii mein jalaa kar shama e soz e aarzuu

Ziist kii rag rag mein khuun e garam daudataa hun main

Bekhudii mein jab khudii kaa raaz ho jaataa hai faash

Kul fizaa e aalam e imkaan pe chhaa jaataa hun main

Khud pe kar letaa hun taarii aalam e diiwaangii

Is tarah kho kar hii apne aap ko paataa hun main

Dil kii dhadakan intehaa e gham se ho jaatii hai tez

Duub kar ahsaas mein taazaa ghazal gaataa hun main

     Main hii main hun is jahaan mein, kuchh nahin mere sivaa

     Duundatii hai aur kis ko ab zamin mere sivaa

          MULLA KI DAUR TO MASJID TAK HI MAHDOOD HAI,
 
          BUUTTQADON MEIN BHI MUJAHID KI AZAAN HOTI HAI


                           HAFIZ MERUTHI SAHAB

                 TEEN DAUR

     - A nazm by Mehr Lal Soni Zia Fatehabadi

Main umr e raftaa ko apnii pukaar saktaa hun

Main umr e raftaa ko apnii pukaar lun hamdam

Main apnii ziist ke gesuu sanwaar saktaa hun

Main apnii ziist ke gesuu sanwaar lun hamdam

Magar ye haal mere zahan par sawaar hai kyun

Ye merii manzil e maqsuud kaa nishaan to nahin

Qaraar hai mere dil ko na ruuh ko hai sukuun

Zamin jise main samajhataa hun aasmaan to nahin

Vo duur saae ufaq par ubharte aate hain

Koii hasinaa e kamsin hai munh chhupae hue

Mahiin reshamii aanchal mein sarsaraate hain

Naquush cheharaa e fardaa ke tamtamae hue  

                JISM

    - A nazm by Mehr Lal Soni Zia Fatehabadi


Jism ek pardaa hai

Ruuh apna nangaapan jis se dhanp letii hai


Jism hai libaas aisaa

Atman pahan kar jo phir utaar letii hai


Jism ek dhokaa hai 

Jis ke jaal mein phans kar zindagii panapatii hai


Jism paa ke uthate hain

Kaaynaat mein nagame

So Nice,,,,,,,,,,,,,,