REKHTA PATAULVI'S GHAZAL

Kaun Milta Hai Ab Murawwat Se
Mil Gaye Aap Mujhko Qismat Se

Tang Aaye Jo Shaam-e-Furqat Se
Bahlein Hain Gesuon Ki Nakhat Se

Humsafar Apne Saath Chhod Gaye
Tang Aakar Diar-e-Ghurbat Se

Tez Tarrar Hain Bahut Qaed
Qaum Ko Bechte Hain Hikmat Se

Fasle Se Raho Isi Mein Hai Khair
Duri Badhti Hai Zyada Qurbat Se

Bewafaee Ki Khoo Se Wo Majboor
Hum Bhi Majboor Apni Fitrat Se

Hum Pashemaan Hain, Par Unhein Dekho
Zulf Suljha Rahe Hain Fursat Se

Rekhta Daur-e-Bezameeri  Mein
Hum Bhi Baaz Aa Gaye Sharafat Se.