Dard-e-jigar ka zikar hai

Dard-e-jigar ka zikar hai
by mazHur


Zalim samajh raha hai jissay een o aan ki baat

Dard-e-jigar ka zikar hai, sauz-e-nihaan ki baat.
 

Badal ki ghun garaj main hai bijli ka shor bhi

Shayed ke ho rahi hai mere aashian ki baat.

 

Shikwa nahi hai mujhko zamanay se ham nasheen

Mujhko rula rahi hai mere mehrbaan ki baat.

 

Surkhi bata rahi hai jawale ki aag ki

Seena zameen ka cheer gayi aasmaan ki  baat.

 

Phoolon ka naz-o-ishwa  jo dekha bahar main

Kanton ko yaad aagayi daur-e-khizaan ki baat.

 

Dunya main gar hai koi haqeeqat tau maut hai

Aur zindagi fareb hai, wehm-o-guman ki baat.
 

Khoon-e-jigar main jab se dubo  li hain unglian

Kaisi nikhar gayi hai meri daastan ki baat.

 

sur mast-eeay-junoon ki qasam bay khabar tha main

rah-e-wafa mein hoti he sood-o- ziyan ki baat?
 

Samjhay ga koi meri kharafaat kis tarah

Koi samajh saka bhi hai ehl-e-zaban ki baat?

 ~~~~~~~~~~~~~~~~~~~~~~~~~~~~~~~~~~~~~~~~~~~~