KAHAAN GAYE TUM

kahaaN gaye tum...
ki teri yaadoN ki rah-guzar par
na jaane kab se udaas, tanhaa
maiN zindagi yuN guzaarta huN
ki jaise seHraa kaa peR koi
bahaar ki ik jhalak ko tarse

kahaaN gaye tum...
ki jab se tum yuN chale gaye ho
tamaam mausam,
sabhi ruteN bhi,
nazar churaa kar chale gaye haiN..

na sard mausam ki dopahar meN
wo pahle jaisi tamaazateN haiN
na garmiyoN ki haseen raatoN
meN ab wo pahli si raahateN haiN
bahaar aati hai ab bhi lekin,
kahaaN wo pahli si baarishen hain
na chaaNd raatoN meN dilkashi hai
na mere geetoN meN naGhmagi hai

kahaaN gaye tum...
tumhaare bin zindagi bhi ab to
gunaah lagne lagi hai mujh ko
jo chand yaadeN tumhaare qurbat ki
aaj tak thiN sahaara apnaa,
jo sabt thiN mere zehn-o-dil par,
so waqt ki gard ne unheN bhi
zehan se mere miTaa diyaa hai..

(NM)........ BYE Dr. Fakir.....