Lagta hai margaya hun main.

Lagta hai margaya hun main
by mazHur


Beyjurm ik saza hun main

Ek dard-e-dil dawa hun main.
 

Baad-e-saba sambhal k chal

Bujhta hua diya hun main.
 

Kante ulajh rahay hain kyun

Gulshan ko jaraha hun main.
 

Aeena dekh kya lia

Aena ban gaya hun main.
 

Dhundlahatain nazar main hain

So kar abhi utha hun main.
 

Qudrat sara-pa raz hai

Yeh raaz janta hun main.
 

Aghaaz kuch bura nahi

Anjaam janta hun main.
 

Badnaam kar na aye junoon

Sach sach bata de kya hun main.
 

Firaun se na kar sawaal

Keh day ga woh khuda hun main.
 

Mujh ko na muskura k dekh

Aye zindagi khafa hun main.
 

Nazren chura rahe hain who

Palkein bicha raha hun main.

 

Iblees kha gaya fareb

apna jo lag raha hun main.

 

Sadqay teri  jafaon ke

Thora sa bewafa hun main.
 

Gar tu qareeb-e-jan hai

Phir kis ko dhoondta hun main?
 

Dil main utar k dekh le

Mujh se na puch kya hun main.

 

Rakhta hun paak farsh-e-dil

Kashaana-e-khuda hun main!
 

Tu hi na kuch   samajh saka

Tujh ko samajh chuka hun main.

 

Yeh shehr jo udaas hai

Lagta hai margaya hun main.
 

Mehfil teri saji rahe

Aye dost ja raha hun main. .

Wah bahut khoob Mazhur ji,great creation.really touched