meri nazar mein

Meri nazar mein apni nazar baar baar rakh
Ek Teer Dil, jigar kay hamesha hi paar rakh

Daman mein uskey gul, meri rahon mein khaar rakh
Ek haath mein sitaray aur ek may ghubaar rakh

Dharkan per apni kuch bhi to, tu ekhtiyar rakh
Aiy beqraar dil too zara to qraar rakh

AankhoN ko ho sakay to zara ashkbaar rakh
"Paiwastah rah shajar sey ummeed-e-bahar rakh"

Gham sey jo hai Talluq usay ustwaar rakh
Rakhna hi hai agar to dil-e-sogwaar rakh

Sarchashma terey dil mein muhabbat ka hai agar
Sookhay har aik hont pey aansoo ki dhaar rakh

Aiy maut zindagi ka abhi haath main hai haath
Thamoonga Tera haath bhi, Tu aitbaar rakh

Dil mein nahin jo ishq to kahey ki bandagi
Sajday mein apnay sar ko agarchey hazaar rakh

Kaaba agar nahin to isay butkada bana
Dil mein Khuda ki yad ya Tasveer-e-yar rakh

Hamlay shadeed hongey anaa key khatib phir
Qaaim khudi key gird Khuda ka hisaar rakh