Wo shaKhs ek shaam meN kitnaa badal gayaa

aaNkhoN kaa rang, baaton kaa lahjaa(tone) badal gayaa
Wo shaKhs ek shaam meN kitnaa badal gayaa !

kuch din to mere saath rahaa wo shaKhs
phir yuN huaa ke uska chehraa badal gayaa

jab apne apne haal pe hum tum na rah sake
to kyaa huaa jo hamse zamaanaa badal gayaa

qadmoN tale jo ret bichii thii wo chal pari
us ne churaayaa haath to dostana  badal gayaa

koii bhii chiiz apnii jagah par nahiiN rahii
jaate hi ek shaKhs ke, kyaa kyaa badal gayaa !

ek sar-khushii kii mauj ne kaisaa kiyaa kamaal
Wo be-niyaaz, saare kaa saaraa badal gayaa

uTh  kar chalaa gayaa koii vaqfe ke darmiyaaN
pardaa uThThaa to saaraa tamaashaa badal gayaa

hairat se saare lafz use dekhte rahe
baatoN meN apnii baat ko kaisaa badal gayaa

kahne ko ek zehn meN diivaar hii banii
ghar kii fizaa, makaaN kaa naqshaa badal gayaa

shaayed dosti ke khel se ubb sa gayaa thaa wo
manzil ke paas aa ke jo rastaa badal gayaa

qaayem kisii bhii haal pe duniyaa nahiiN rahii
taabiir kho gayii, kabhii sapnaa badal gayaa

manzar kaa rang asl meN saayaa thaa rang kaa
jis ne use jidhar se bhii dekhaa badal gayaa

andar ke mausamoN kii Khabar us kii ho gayii
us nau-bahaar-e-naaz kaa chehraa badal gayaa

aaNkhoN meN jitne ashq the jugnuu se ban gaye
vo muskuraayaa aur merii duniyaa badal gayaa

apnii galii meN apnaa hii ghar dhhuNdhtee haiN log
"A***y" ye kaun sa hai shahar jaha har shKahs ka chehra badal gayaa

 

  waah waah