aaye na jab teri yaad

Mujhe tum vo din vo jagah vo raat bata do,
Aaye na jab teri yaad, mujhe vo barsaat bata do,
Bhulane ko to tujhe hamne kabka bhula diya,
Bhulein kaise khud ko,bas ye baat bata do,

Aankhon mein kuch khwaabon ke tootne kee aahat,
Kaanon se pehle dil tak pahunchti hai,
Dil jab dhak se hota hai,
To aansun hosh khoke,
Waqt bewaqt nikalte hain, Inhe kaise sambhalun main bas ye baat bata do...
Mujhe tum vo din vo jagah vo raat bata do....

June kee tapti hui dopahar,
aur shaakhon se girte patte....
Aansmaan mein bada sa sooraj aur tera chota sa rumaal......
Dhool tumhe paas lati thi...
Aankh kee kirkiri to tumne nikal dee thi...
Dil mein ek kirkiri abhi tak kadak rahi hai...
Use kaise nikalun main.... bas ye baat bata do...
Mujhe tum vo din vo jagah vo raat bata do....

Aansmaan mein taaron kee chaadar
Ek tera bheega hua tan
Geele baalon kee khushboo,
Aur kajal se bante chaand...
Aansmaan dekho aaj khali hai,
Taare to tum le gayin.... Chaand kaise banaun main..... bas ye baat bata do....
Mujhe tum vo din vo jagah vo raat bata do....

Ek dooje ka haath pakad ke,
baarish mein jab bheeg rahe the,
Tarbatar hoke fir ped ke neeche sookh rahe the,
Main bhi bheega tum bhi bheegi,
Dupatta to tera sookh gaya tha,
Ped kee vo daal abhi tak bheeg rahi hai.....
Aayenge kab hum ye pooch rahi hai....
Use kya batlaun main..... bas ye baat bata do,
Mujhe tum vo din vo jagah vo raat bata do....

Dher saari teri baatein,
ek tera saari wala photo,
Hisaab ke kuch purze aur
Kismat wala ek sikka,
Tooti mala ke moti aur
Aansuon mein bheege tere khat rakhein hain....
Kya rakhun, kya fenkun main.... bas ye
baat bata do,
Mujhe tum vo din vo jagah vo raat bata do....

nice one

wah bahut accha likha hai aapne aru

Bohot hi khoobsurat Nazm Arvind sahab, kya khoobsurti aur sadgi se apne jazbaat ko peshe kalam kiya hai.

Pehla misra toh bohot khoobsurat aur baad ke har ashaar lajaawab, wakai dil se nikla hue ashaar hai aapke.

thanx suman jee....

Aisi baat nahin hai CIC jee...ek ek karke kar rha tha....thats why..deri ke liye maafi chahta hun....bahut bahut shukriya aapka meri rachna pe apna keemti waqt dene ke liye...