Ai mausam e bahaar, mera dil hai be qaraar.:Shayri for Dard -e- Judai

Ghulam Haider

Guest

Ahl e bazm aadaab ! Is ghazal mein main ne ye fikr pesh ki hai ke mere firaaq mein meri maHbooba ki kya haalat hai aur woh mujh se kis tarah apne haal ka izhaar karti hai. Har chand is ghazal ka shayer main hoN, Lekin apne tasavvur aur ihsaas ke zariye maiN ne apni mahbooba ke khayaal ko qalamband kiya hai. Is baat ki taraf maiN ne is liye ishaarah karna zuroori samjha hai ke koi bhi naazir, maqta' par baghair soche samjhe ia'tiraaz na kare baiThe. Aap ki aaraa mere liye mufeed haiN.

Ai mausam e bahaar, mera dil hai be qaraar.
Har shai pe hai nikhaar, mera dil hai be qaraar.

Chamke kahiN se koii to ummeed ki kiran,
Mushkil hai intizaar, mera dil hai be qaraar.

BetaabiyoN meN raat guzaari hai jaag kar,
Jaa neeNd ke khumaar, mera dil hai be qaraar.

Is aamad e bahaar se ai hamsafar terii,
Yaad aaye baar baar, mera dil hai be qaraar.

Kaisa sukoon har ghaRi tere firaaq ka,
Chubhta hai dil meiN khaar, mera dil hai be qaraar.

AaNkheN chhalak utheNgi jo chheRoN maiN dil ka saaz,
TooTa hai dil ka taar, mera dil hai be qaraar.

KaT te NahiN firaaq ke lamhe, kisi tarah-
-aata nahiN qaraar, mera dil hai be qaraar.

Haider ye mukhtasar si hai faurqat ki daastan,
Ai mere gham gusaar mera dil hai be qaraar.


	Logged

Similar Poetry and Posts (Note: Find replies to above post after the related posts and poetry)
	~~ Mila Hai Qaraar ~~ by Qutubuddin in Shayri-E-Dard
	mausam ki bahaar by sanya310 in Mazahiya Shayri(Funny Shayari)
	Muddat se jis ke waaste dil be qaraar tha by hina ki talsah in Other Languages
	Meri Chahat Mera Ess Dil Ka Qaraar Hai Tu by ishu_singh10 in Shayri for Khumar -e- Ishq
	Mera Fasl-e-Gul se Hisab hai, Mera Karz Tay Hai Bahaar Par..... by vipul kumar in Ghazals

riyaz106

Guest

Re: Ai mausam e bahaar, mera dil hai be qaraar.

«Reply #1 on: July 03, 2010, 05:33:38 AM »

Bahut shandaar aur purkashish ghazal kahi hai janab Haider Sb. Taghazzul se pur aur har lihaaz se mukammal is takhleeq ke liye mubarakbaad aur daad qubool farmayen.

Is hal-e-zaar ki unhen koi to de khabar
Ankhen hain ashkbaar mera dil hai beqaraar


	Logged

Ghulam Haider

Guest

Re: Ai mausam e bahaar, mera dil hai be qaraar.

«Reply #2 on: July 03, 2010, 10:45:27 PM »

Quote from: riyaz106 on July 03, 2010, 05:33:38 AM

Bohot khoob janaab ! Kya hi khoobsoorat aur chaspaN shea'r pesh kiya hai. Meri taraf se is jaalib shea'r par daad qubool farmaayeN.
Ham fikr o ham khayaal jo Thehre hamaare aap,
Dil meN hamaare, aap ka ooNcha muqaam hai.


	Logged

Pages: [1]

Yoindia ShayariAdab > Shayri ( Poetry ) or Shayari > Shayri for Dard -e- Judai > Topic: Ai mausam e bahaar, mera dil hai be qaraar.