yuN na the .... (zarra)

nikaley jigar e chaak se naaley to yuN na the
gham itna kabhii jaam meiN daaley to yuN na the

jis taur e naazukee se jalaayaa hai inko aaj
khat mere kabhii usne samhaaley to yuN na the

aaye zaroor hoNge wo kal shab ke khwaab meiN
benoor subah ke ye ujaaley to yuN na the

tooney kiya na qatl fakat dii sazaa e hijr
phir kartey khud ko terey hawaaley to yuN na the

aisaa nahiN ki inse tapaktaa na tha lahoo
zaahir kabhii tum pe mere chhaaley yo yuN na the

bebaakee betakallufee aatii thii kya hameiN
detey na tum jo haath meiN pyaaley to yuN na the