ZULF-E-PAREESHAAN .. ZARRAA

raNg-e-aariz meiN mile zulf-e-pareeshaaN meiN mile
is khizaaN aasra kuchh wahm-e-bahaaraaN meiN mile

(raNg-e-aariz = colour of cheeks, zulf-e-pareeshaaN = scattered hair, khizaaN = autumn, wahm-e-bahaaraaN = fantasy of spring)

 
lutf ye wo jo faqat mausam-e-hijraaN meiN mile
wasl se zyaada khushi wasl ke imkaaN meiN mile
 
(mausam-e-hijraaN = season of separation, wasl = union, imkaaN = possibility)
 
 
kya kh'moshi ki salaakheiN ye kabhi tooteNgee
jab mile ankahi baatoN ke hi zindaaN meiN mile
 
(zindaaN =prison)
 
 
teri jaanib se ishaara hi koyee mil jaataa
deeda-e-tar meiN mile ya lab-e-khandaaN meiN mile
 
(jaanib = direction, deeda-e-tar=wet eyes, lab-e-khandaaN = smiling lips)
 
 
ek saaghar meiN sharaabeiN hoN mileeN do jaise
husn-e-jaanaaN ka tasavvur gham-e-jaanaaN meiN mile
 
(saaghar = cup, tasavvur = imagination)
 
 
hum ne to sair gulistaaN ki hai chhorhee kab se
hum se milna ho jise aa ke bayaabaaN meiN mile
 
 
mere chehre se mera haal samajhne waaloN
kab hai khwaaboN ka pataa abroo-o-mizhgaaN meiN mile
 
(abroo = eyebrows, mizhgaaN = eyelashes)
 
 
phir se jeene ki hai hasrat si uthee kyooN "zarraa"
us ke kya naqsh-e-qadam gor-e-gareebaaN meiN mile

(naqsh-e-qadam = foot marks, gor-e-gareebaaN = graves of the poor)

- zarraa

wahh...

WAAH BOHUT KHUB

Massssssssssssssssssssst 

mashallah.... behad khoobsurat!