aaj un se shikaayat ... zarraa

aaj un se shikaayat to ji bhar kari
haaN magar apne ji ke hi andar kari

baat hoti hai un se bhi kab mukhtasar*
rooth kar kuchh kari kuchh mana kar kari

jab diya husn tu ne usey bepanaah*
had mere ishq ki kyooN mukarrar* kari

hum se poochho ke aaNkheiN bhi kya bolteeN
ek tasweer se baat aksar kari

jab n hasrat ka khud se kiya aitraaf*
kya kaheiN kyooN n un pe ujaagar* kari

taakta hooN maiN khaamosh darwaaze ko
dastak ab ki dafa tum ne dil par kari

ek ye hi naheeN dahr* haiN aur bhi
tark* ab tak n ummeed-e-dilbar kari

baat meri hi dohra raha tha raqeeb
baat meri thi par mujh se behtar kari

rind* bhi ab naheeN jin ko ilzaam deiN
zindagi har khata ab tere sar kari

zabt* ke din kiye “zarraa” ik ik jama
ik hi shab meiN kasar sab baraabar kari

- zarraa

*
mukhtasar = brief
ujaagar = manifest
bepanaah = limitless
had mukarrar = set a limit
aitraaf = confession
dahr = world/era
tark = relinquish
rind = drunkards
zabt = control