BARISH THI HUM THEY

Barish thi hum they our ghani ho rahi thi shaam
tum ne liya tha kanpte hotoon se mera naam

main ne kaha tha ao younhi bheegte chale
in raaston mein der talak ghoomte rahe
meri kamar main hath yeh phooloon sa daal kar
kandhey pay mere rakhe raho younhi apna sar

Hatoon ko kabhi main baloon ko choom loon
daikho meri taraf to main ankhoon ko choom loon
Pani ke ye jo phool hain rukh par khile huwe
in main dhanak ke rang hain sare ghule huwe

Hontoon se in ko chunte rahe khush dili k sath
taray hame talash kare chandni k sath
youn hi kisi darakh ke niche khare rahe
Barish ke deer baad bhi lipte khare rahe

Tum ne kaha tha ao chale raat aa gai
dil jis se dar raha tha wohi baat agai
Bitey same ki yaad hi rastoon main reh na jay
Yeh dil kahin wisal ki barish main beh na jay

Kuch deer aik chup si rahi darmiyan main
girhain si jaisee parne lagi hoon zaban main
Ek dam gira tha phool koi shakhsar se
Daikha tha tum ne meri taraf iztarar se

Barish main bheegtey hue jhoonkay hawa ke they
wo chand be guman se lamhe, bala ke they
Nasha sa charoon taraf phailta gaya
Phir us k baad main ne tumhe kuch nahi kaha