MaiN Bayaan Kaise KarooN Ise, Mere Dil meN Kaisa Suroor Hai.

MaiN bayaan kaise karoN ise, Mere dil meN kaisa suroor hai.
Koi kaifiyyat hai yaqeen ki, Ye suroor fouq-e-shuo'oor hai.

Jise lams koi na kar sake, Jise dark koi na kar ssake,
Wo adam nahiN wo vujood hai, Jo his-e-havaas se door hai.

Jo qareeb ho ke Ali rahe, Jo bae'eed ho ke jali rahe,
Jo ho zarre zarre meN jalvagar, Jo nazar na aaye wo noor hai.

Ye jo gardish-e-lail o nahaar hai, ye hi aamad o raft-e-bahaar hai,
Ye nizaam kaar-e-abas nahiN, Koi raaz is meN zuroor hai.

Ai bashar tu hai kitna kam nazar, ke haqeeqatoN se hai be khabar,
Tu wo aik mush ghubaar hai, Jise apne dam pe ghuroor hai.

Jise tu na dekh saka kabhi, Jise tu na soch saka kabhi,
Wo khta kisi ki khata nahiN, Wo teri nazar ka qusoor hai.

MaiN chala hoN chhorh ke ye jahaN, Mujhe mil gai hai rah-e-jinaN,
Mujhe koi khouf o khatar nahiN, Mere dil meN ishq-e-huzoor hai.

"Jahl or ilm haiN darya, magar haider mere paas.
Ilm hai qatra-e-naacheez, jahl ki nisbat".
Is ia'teraaf ke saath apni kaavishat ko lekar haazir ho jata hoN.
Aap log tashveeq dilaate ho to shouq aour barh jata hai.

Ghulam Haider ji,
Zarrahnawaazee ka shukriyah! Aap ka kalaam padhhney sey tabiyat 'haree' ho jaatee hai! Taksaal sey ziyaadah sey ziyaadah 'maal' baahar nikaaltey rahiye, aur hamain 'kavyaanand' kaa mouqah deytey rahiye!
                                            - abd bundeli