MASTI BHARI NIGAAHOn KI JAADUGARI KI BAAT (WAQUIF ANSARI)

Ye daastaan-e-ishq hai ya zindagi ki baat
QistoN meiN ho rahi hai yahaN Khudkushi ki baat

Pandit ki baat hai to kabhi Maulvi ki baat
Karta nahiN hai koi yahaN aadmi ki baat

GustaaKhiyoN ki baat hai aawaargi ki baat
Sach poochhiye jo kah dooN agar teergi ki baat

Rahne bhi dijiye badi, paakeezgi ki baat
Shaayir haiN aap kijiye kuchh shaayari ki baat

Shab bhar sawoobatoN ki hiraasat meiN tha magar
Waqt-e-sahar hai hoNtoN pe zindah-dili ki baat

Shabnam ki nikhatoN ke ewaz gulfishaaN hai gul
Aatish-nawa hai phooloN meiN ik ik kali ki baat

Ik Aaina hai saamne kya kya bayaN karooN
Gesu ki, surKh hoNtoN ki ya saadgi ki baat

Hoti nahiN hai qaid meiN lafz-o-bayaan ki
Masti bhari nigaahoN ki jaadugari ki baat

“Girte haiN shahsawaar hi maidaan-e-jung meiN”
MaiN laDkhaDa gaya bhi to kya hai badi ki baat

Zulm-o-sitam ko dekh ke gar lab na kul sakeN
Meri nazar meiN hai ye shikasta-dili ki baat

Insaaniyat ke waste WAQUIF hazaar-ha
Karte haiN dushmanoN se bhi hum dosti ki baat

Waqif Sahab ye ghazal hai ya karishma. Itni khoobsurat ghazal likhne wala beshak aala zehn ka maalik hoga. Kaise tareef karun samajh nahi aa raha, lafz sochne pad rahe hain. Bas itna hi kehta hun marhaba, sudafreen, muqarrar.

Janaab Riyaz Saheb! Aap ki Ghazal ne (Har Gham mira tumhaare liye hai khushi ki baat.....Behtar yahi hai tum na karo dosti ki baat)mujhe majboor kar diya k maiN bhi kuchh tukbandi karooN. Aapki ghazal hi aisi pur-kashish hai k koi bhi ise padh kar shaayari ke khoobsurat samundar meiN Ghota-zan ho sakta hai. Aap ne apne khoobsurat alfaazoN se meri kavish ki paziraaye ki, is liye maiN aapka mashkoor hooN. Shukriya, shukriya, shukriya.

Janaab Waquif Ansari Sahab Adaab arz hai,
Aapki is pur-kashish aur behad khoobsurat alfaz-o-tameer se labrez ghazal ko is post se pahle sun-ne ka jo mauka mujhe haasil hua uske liye aapka azhad sukrgujar hun. Magar ise aaj dekhne ka jo mauka mila to khwab ki tameer jaisa laga.

Main Ishwar se prarthna karta hun ki bas aapki qualam chalti rahe aur aapke kalaam ki bemisaal taseer se shayari ko hararat aur rawani ataa hoti rahe...Sudafreen.
 

Lajwaab, jitni bhi tareef ki jaaye kam hi hogi..........

Ek Ek lafz dil ko chhoo lene wala hai

Sophi Ji aapke khoobsurat alfaazoN ka bahut bahut shukriya. Isi tarah daad-o-tahseen se nawaazte rahiye.

khwaish ji. Aapne meri kaavish ko pasand farmaaya, is ka maiN shukriya ada karna apna farz samajhta hooN. Many many thanks indeed for your valuable comments.

Rishi Ji! Aapki nawaazish ka bahut bahut shukriya.