mere nasiib ne jab mujh se intaqaam liyaa

mere nasiib ne jab mujh se intaqaam liyaa
kahaa.N kahaa.N terii yaado.n ne haath thaam liyaa

fizaa kii aa.Nkh bhar aa_ii havaa kaa rang u.Daa
sakuut-e-shaam ne chupake se teraa naam liyaa

[sakuut = silence]

vo mai.n nahii.n thaa ek harf bhii na kah payaa
vo bebasii thii ke jis ne teraa salaam liyaa

har ek Khushii ne tere Gam kii aabaruu rakh lii
har ek Khushii se tere Gam ne intaqaam liyaa   (NM)