میں مر جاؤں فقط وہ ہی کہاں مجبور کرتا ہے

میں مر جاؤں فقط وہ ہی کہاں مجبور کرتا ہے
جو سچ پوچھو تو یہ سارا جہاں مجبورکرتا ہے

طلاطم خیز موجوں کے میں طعنے سن نہیں سکتا
میں کشتی روک دوں کیوں بادباں مجبور کرتا ھے

جلا دو اعلیٰ ایوانوں کی اس خونی عمارت کو
مجھے بستی کا ہر پیرو جواں مجبور کرتا ہے

نہین ہے خوف آندھی کا نہ تاریکی سے ڈرتا ہوں
میں جلدی لوٹ آؤں آشیاں مجبور کرتا ہے

میں دیوارِ چمن پر بیٹھ کر گانے کا عادی ہوں
گلوں کے پاس بیٹھوں باغباں مجبور کرتا ہے

نجانے کھو گیا ہے کیا کہ میرِکارواں کو بھی
پلٹ کر ڈھونڈنے پہ کارواں مجبور کرتا ہے

یہ آنسو میرے کہنے پر بھلا کب رقص کرتے ہیں
انہیں پہلو میں بیٹھا بے زباں مجبور کرتا ہے

کسی کے واسطے افضلؔ یہ ٹہنی سر جھکاتی ہے
ثمرٹہنی کو جھکنے پر کہاں مجبور کرتا ہے