jis makaa.n ke saamne guzra wahaa.n zakhmi hua

kucchh doston ka feedback that ki chand alfaaz ya metaphors samajhne mein mushkil si ho rahee thi. feedback ko sar aankh pe rakhte hue, is ghazal mein kucchh alfaaz ka angrezi tarjumaan karne ki koshish ki hai. koshish isliye kehta hun kyunki urdu, aur khaas taur se jab uska istemaal shayari mein hota hai, apne aap mein incomparable hai aur kisi aur zabaan mein iska approximation hi ho sakta hai, translation nahin.


jis makaa.n ke saamne guzra wahaa.n zakhmi hua
maallumaat-e-zindagi ke waaste ye bhi hua

(maallumaat-e-zindagi = to get to know about life)


pairahan ko taar kar haasil na kucchh ilmi hua
sirf tanhai mili bas faaydaa ye hi hua

(pairahan = clothes, taar = tear away, ilmi = pertaining to knowledge, tanhai = solitude)


dil ke tukade is tarah se kooche kooche par gire
dhoondhane ka dard honaa chaak pe bhaari hua

(koocha = street / way, honaa chaak = being cut into pieces, bhaari hua = here it means “was more than”)


Jashn ne ghera hua hai kya gham-e-dil ka karoon
dekh ye kambakht khushiyaan aur bhi baaghi hua

(gham-e-dil = sorrow of heart, baaghi = rebel)


dar rahe the raaz-e-giriya khul na jaaye khalq pe
raaz dil mein hi rahaa charchaa magar fir bhi hua

(raaz-e-giriya = secret of crying, khalq = world)


bekhayaali mei.n na jaane ek pal kya keh diya
log kehte hai.n ki wo insaan tha vahshi hua

(bekhayaali = unguarded moment, vahshi = wild / animal like)

waahhhhhhhhh zarra ji kya khubbb kaha hai aapne...bht hi khub surat likha hai....har ek sher apne aap me kabile tareef hai

shukriya kasak ji aur koyal ji aapkee taareef ka.

koyal ji, aapke sher ne guftaar mein acchhaa ghumaav diya hai

ek taazaa sher keh raha hoon isee ghazal mein ...

sang dil jiske makaa.n mei.n ho muhaafiz sang dast
kisliye hairaa.n ho gar jism-o-jigar zakhmi hua

(sang dil = stone hearted, muhafiz =  preserver / protector, sang dast = stone fisted, jism-o-jigar = body and heart)

ZARRA SAHAB AAPKA UMDA KALAAM PADH KAR ..MAINE TO BAS YUN HI TUK BANDI KAR DI ...GUSTAKHI MAAF KAREN ...AAP KE KHOOB SURAT AUR NAZUK KALAAM KE LIYE DIL SE DAAD......AAPKA  APNA REHAN MUBARAK "TANHAA