KABHI ASHK HAI , KABHI AAH HAI .......................HASAN

 (ye ghazal abd bundeli saheb ke shukriye ke sath post kar raha
  hoon jinki pichlie hafte post ki gai eik ghazal ke qafiyon ne
  mujhe apni iss ghazal ko ,jiska sirf matla moujood thha , puri
  karne ki targheeb di - Hasan)

  ..............................................................


Kabhi  Ashk  hai  , kabhi  Aah  hai ,
         meri  Zeest   eik   karaah  hai ;
Meri  sabr-o-Shukr  se  dosti ,
         mera   ranj-o-gham   se   nibaah  hai

Mujhe  pastiyoN  se  na  tuu  daraa ,
        mujhe  baal-o-par  pe  yaqeen  hai ;
Main  bulandiyoN  ka  Safeer  hooN  ,
        meri  Aasmaan   pe   nigaah  hai

Nahi  khush  hum apni khushee  se  ,
       doosre ki  khushi  se  dukhi  magar ;
Na  Qana'ateiN  ,  na RafaaqateiN  ,
       ye  jahaaN  isi  meiN  tabaah  hai

Tujhe  bhook  hai  na  pyaas  hai ,
       na  hi  sard-o-garm  ki  fikr  hai ;
Tu  Faqeer  hai   ki  Malang  hai ,
       na   Qaba   koi  ,  na  kulaah  hai

Mujhe  Roz-e-Hashr  ki  fikr  kya ,
       mujhe  Pul - Siraat  ka  khauff  kya ;
MaiN , 'Hasan' , Ghulaam-e- Rasool  hooN ,
       mujhe  Mustafa   ki   panaah   hai





............
Ashk = aansu ; Zeest= Zindagi ;Pasti = Nichaai ;baal o par=wings; bulandi= oonchaai ;safeer = ambassador/advocate ; qana'at = content ; rafaaqat = dosti ; malang = saadhu ; qabaa= dress ; kulaaah = topi / headgear ; roz e hashr = qayamat ka din ; Pul siraat = the razor edge bridge on which no guilty can walk

badee shiddat se intezaar thaa aapkee kisee ghazal kaa aaj tamannaa pooree hui badee shaandaar ghazal hai bahut bahut mubaarak

wah wah...hasanji....bahut bahut khoob...daad....

Aadaab Hasan Sir
khoob. bahut khoob...kya jabardast kalaam pesh kiya hai aapne.. maja aa gaya..par mere liye thoda tough tha..meanings the to thoda aasaan ho gaya.. ek baar samajh paaya to dil jhoom uthaa. vaaaaaaaaaaaaaaaah

 

QALB  SAHEB  , HAUSLA  AFZAI  KE  LIYE  BAHUT  SHUKRIYA .

bhut khub hasan ji...

bahut shukriya , Parwaaz saheb.Nazr e karam banaayr rakhye.