Kahan Ke Hai?

Sannaton ka shor hai, andheron ka ujala, isme na jaane hum kahan ke hai,
Kiski khamoshiyon ne kisko hai maara, Bezubaan yeh raaste kahan ke hai?

Ek khalish hai mohabbat, Ek aarzu, ek umeed, rawaan dilon ki kahaani,
Tab kisi skahks ne poocha banjare se, Bataye to ye jazbe kahan ke hai?

Khud hi likhte rahe, Sunate rahe, log wah wah ke saath sarhaate rahe,
Dard ne dil se nikal kar khud poocha mujhse, Yeh log bata kahan ke hai?

Hasrat-e-Sana na hui kaboool jab, kii Ghar-e-Khuda me duaon se guzaarish,
Dasht-e-Dua se hata to kisi ne poocha, Ke yeh paani ke katre kahan ke hai?

Ghar ke taraf jab chalne laga, kuch ruka, chalne laga, baherhal chalta raha,
Kisi ne kaha “Abrar” se poocho, wohi jaanta hai, ye raaste kahan ke hai?

Sannaton ka shor hai, andheron ka ujala, isme na jaane hum kahan ke hai,
Kiski khamoshiyon ne kisko hai maara, Bezubaan yeh raaste kahan ke hai?

Bohot Bohot shukriyah pasand karne ke liye janaab... Aage bhi saath dete rahe...

Duaon ke saath Ijazat,

Abrar.