Mohtaj DiLLi:Shayri-E-Dard

Mohtaj DiLLi

by Saavan on August 26, 2017, 10:20:07 AM

Pages: [1]

Author

(Read 662 times)

Ulajhte sawalo ki abujh paheli si Dilli hai
Bante Bigdte rishto ki Athkheli si Dilli hai
Woqt ki tarh ye roj badlti hai...
Herpal-Herchhd nayi naveli si Dilli hai.

Yaha ki abohawa me Tanhai hai
Yaha ki rasme-wafa me Bewafai hai
Log ghut-ghut ke yaha jite hai..
Ik purani haveli si Dilli hai.

'ilm' ki yaha koi ijjat nahi
Aql ki yaha koi keemat nahi
Imandari yaha Bewakufi hai Sahib..
Jhuth aur Fareb ki Saheli si Dilli hai.

Kahne ko to Qutubminar hai yaha
Dil Lubhata 'Mina-Bajar'hai yaha..
Chandni Chauk ki rangbirangi gliyan hai
Per jane kyu bas ik Hasi-Thitholi si Dilli hai.

Na yaha ke lafjo me 'Nafasat' hai
Na yaha ke Lahje me 'Adawat' hai..
Bat-Bat pe log mara-mari pe utar ate hai
Kuchh Badtamiz logo ki Toli si Dilli hai.

Pine ko na Saf 'Pani' mayassar hai
Jine ko na Taji Hawa Nasib...
Dhup bhi yaha Khidkiya dekhkr ati hai
Dhul-bhare Tufano ki bas Reli si Dilli hai.

Bihar ki Badnasibi hai yaha, U.P. Ki Berojgari bhi
M.P. Ki thami Saase hai kahi, To Udisa ki Lachari bhi.
Ek hi 'Chaal' me sablog Basher kerte hai...
Mumbai ki kisi 'Kholi' si Dilli hai.

Sharmo-Haya ka nahi hai lihaz yaha
Laz ko bhi aa jaye 'Laz' yaha..
Jishmofaroshi ka sare-aam byapar hai
Man-Maryadao ki 'Jalti Holi'si Dilli hai.

Jarre-Jarre pe yaha kai Raj milenge
Paise-Paise ko yaha log Mohtaj milenge..
Sab kehte hai ki ye 'Dilwalo ka Shaher' hai...
Per mere liye to 'Bhikhariyo ki Khali Jholi' si Dilli hai.

Saavansahib...

Jump to: