Samaj: Ek Bus

Sabhyata bus mein bade kayde se baithi hain
Bade maze mein apne fayde se baithi hain
Khoon ko chuusne mein leen kisi machhar ki tarah
Kuraan o gita o bible ke akkshar ki tarah
Kanoon conductor sa khada ticket talab karta hai
Jeb bhaadi ho jinki unki adab karta hai
Niyam takhti pe tangi ameeron ka wajan dho rahi hai
Be ticket bus mein safar karna badi chori hai
Bahar footpath pe ek bachhi khadi ro rahi hai....

Bus ke driver ka naam satta hai
Chaaro pahiye iske isharon pe naachte hain
Sadak ke chote mote log isse kaapte hain
Jaane kitno ke lahoo se sane hain pahiye iske
Aur kitne sitam chupchap yuun sahiye iske
Shaam bus adde mein aati hai,driver engine off karta hai
Toh kaanon mal mal ke iske pahiye saaf karta hai

Bus mein ek horn bhi hai
Naytikta ki tarah[MORALITY]
Cheekhti hai..bahut chillati hai
Bus ke neeche aane se bachati hai
Sambhal sambhal ke...kinaare kinaare
Chalna humein sikhati hai