kabhi neta kabhi pujari kabhi kazi ke chakkar me
desh barbaad hota raha bus mazhabi hone ke chakkar me
aaj bhi mazhab ko kya theek se samajh paye nahi
aaj bhi hum dil se kya hindu muslim mita paye nahi
phir kyun nahi hum har dharm ki awaaz sunte hain
har dharm insaniyat aage rakhta ye samajhte hain
phir kyun aur kis binaah par hum dilwale bante hain
aaj bhi kyun aadmi aadmi ka khoon kar khush hote hain.
aaj bhi hum dharm ke thekedaaron me fanse hue hain
aaj bhi aise log aadmi ko insaniyat se door rakhe hue hain
Geeta aur Kuraan padhna bekaar hai agar dil me sabke lie pyaar nahi
bhagwaan ki aarti utaarna bekaar hai jo dil me harek ke lie akhlaaq nahi
gurudwaare aur church jane ki bhi kya zarurat
agar aadmi ko insaniyat ki hi nahi lagti zarurat
aakhir kitne log mare jate hain ja rahe hain
kabhi Babri masjid kabhi Ramjanm bhumi neta jap rahe hain
kitne log mumbai dangon me maare gaye
kitne log bharat pakistaan ke batware me maare gaye
kitne log godhra hatya kand me mare gaye
kaun hisaab dega ab tak mare gaye logon ka
hum bhool jayenge insaniyat ko nahi bhulana ise
kyun mare gaye kisi me himmat hai to jawaab de
sirf aur sirf ye dikhawe ke mazhabipan me maare gaye
hum ye sochte hain hamara dharm jo kahta hai vo sahi hai
itna bhi nahi samajhte ki uparwala sirf ek hai hamesha se hi
hum gurudware jate hain par kya namaaz ke baaren me jante hain
hum namaaz padhte hain par kya geeta ke shlok samajhte hain
hakeekat to ye hai ki apne apne dharm ko hi hum theek se nahi samajhte
gar samajhte to aaj aise samajhne vaale log bahut zyada hote
gar samajhte to aaj tak itne log na maare gaye hote
gar samajhte to aaj bhi hum dil me nafrat na rakh rahe hote
zarurat hai ki hum ise samjhe ise mane
har aadmi barabar hai dil se jane
har mazhab yehi batata hai sabse pehle
kisi ka dil dukhake hume kabhi na khushi mile
har banda uska hai har bande ko usi ne banaya hai
aao aise rahen parmatma bhi garv kare usne hume banaya hai
on eTI community..
